կարևոր
3133 դիտում, 1 տարի առաջ - 2022-10-10 23:58
Հասարակություն

ՀՖՖ գործկոմը զբաղվում է ամեն ինչով, բացի ֆուտբոլի զարգացումից. Աննա Թադևոսյանը լքում է պաշտոնը

ՀՖՖ գործկոմը զբաղվում է ամեն ինչով, բացի ֆուտբոլի զարգացումից. Աննա Թադևոսյանը լքում  է պաշտոնը

ՀՖՖ գործկոմի անդամ, Հայաստանում կանանց ֆուտբոլի համակարգող Աննա Թադևոսյանը ֆեյսբուքյան իր էջում գրառմամբ հայտնել է գործադիր կոմիտեում աշխատանքը դադարեցնելու որոշման մասին:

«Հարգելի ընկերներ,

Ցանկանում եմ տեղեկացնել, որ այլևս հարկ չեմ համարում շարունակել իմ աշխատանքը ՀՖՖ գործադիր կոմիտեում, քանի որ այս կառույցը զբաղվում է ամեն ինչով, բացի ֆուտբոլի զարգացումից:

Վերջին մեկ տարվա ընթացքում ՀՖՖ ղեկավարությունը կայացրել է մի շարք անհիմն ներքին որոշումներ, ինչի արդյունքում աշխատանքից հեռացվել են մարդիկ, որոնք ջանք չեն խնայել ֆուտբոլի զարգացման համար։

ՀՖՖ-ին մաղթում եմ հաջող Fastex բարձրագույն խմբի առաջնություն, քանի որ գործկոմի նիստերը գրեթե միշտ ուղղված են եղել դրան:

Ինչ վերաբերում է ինձ, ապա ես չեմ դադարելու զբաղվել կանանց ֆուտբոլով. շարունակելու եմ անել այն, ինչ սկսել եմ դեռևս 2015թ.-ին:

Սա իմ համար երբեք աշխատանք չի եղել, կամ էլ փող աշխատելու միջոց: Ես փոխել եմ ու շարունակելու եմ փոխել շատ աղջիկների կյանքեր՝ օգտագործելով ֆուտբոլը որպես գործիք»,- ասված է հայտարարության մեջ:

Հիշեցնենք՝ օրեր առաջ հայտնի էր դարձել, որ ՀՖՖ-ն, հիմք ընդունելով մեկ օրվա բացակայությունը, աշխատանքից ազատել է Կանանց ֆուտբոլի բաժնի պետ Լիլիթ Մուրադյանին: Խնդրին իր էջում անդրադարձել էր նաև Թադևոսյանը: