ՃՏՊ-ներն ավելացել են, դրանց հետևանք մահացությունները` նվազել

2014-ին ճանապարհատրանսպորտային պատահարների և դրանց արդյունքում առաջացած մարմնական վնասվածքների աճ է նկատվել, փոխարենը նվազել է ՃՏՊ-ների հետևանքով մահացությունների թիվը: Այս մասին լրագրողների հետ հանդիպման ժամանակ հայտարարեց ճանապարհային ոստիկանության ծառայության պետ, ոստիկանության գեներալ-մայոր Արտակ Հարությունյանը: Մահացությունների նվազումը գեներալ-մայորը կապում է արագաչափերի, տեսանկարահող սարքերի տեղադրման և այլ կանխարգելիչ միջոցառումների հետ:

Նրա խոսքով` 2014 թվականի ընթացքում գրանցվել է 3156 ճանապարհատրանսպորտային պատահար, որոնց ընթացքում զոհվել է 297, մարմնական վնասվածք ստացել` 4479 մարդ: Հաշվետու ժամանակահատվածի ընթացքում երթեւեկության արագության գերազանցման խախտմամբ գրանցվել է 28 812 խախտում` նախորդ տարվա 3923-ի համեմատ, ոչ սթափ վարելու 3466 դեպք է գրանցվել` նախորդ տարվա 2745-ի համեմատ:

Հարությունյանը ներկայացրեց նաև 2014-ին ՃՈ աշխատակիցների նկատմամբ կատարված ծառայողական քննությունների արդյունքները: Համաձայն դրանց` 2014-ին 68 ճանապարհային ոստիկան է աշխատանքից ազատվել` նախորդ տարվա 45-ի փոխարեն: