Ադրբեջանում ընդդիմադիր լրագրողը 5 տարով ազատազրկվել է՝ խուլիգանության մեղադրանքով

Ադրբեջանական «Ազադլըգ» թերթի աշխատակից և «Ադրբեջանական ժամ» ինտերնետային ծրագրի հաղորդավար Սեյմուր Խազին մեղավոր է ճանաչվել խուլիգանության համար և ազատազրկվել 5 տարով. հայտնում է contact.az-ը:

Նույն գործով մեկ այլ մեղադրյալ` Մագերամ Հասանովը, որը Խազիին կռվի էր դրդել, ընդամենը 6 ամսվա ազատազրկման է դատապարտվել:

Լրագրողի փաստաբան Ադըլ Իսմայլովը իր ամփոփիչ խոսքում նշել է, որ եթե լրագրողը չարդարացվի, դա կնշանակի, որ լրագրողին հետապնդում են քաղաքական դրդապատճառներով՝ որպես իշխանությանը քննադատող ակտիվիստի:

«Իմ պապերին բռնաճնշել են 1937 թվականին: Այժմ մեզ ճնշում է համակարգը, որն ստեղծվել է Ազգային անվտանգության բյուրոյի գեներալ Հեյդար Ալիևի կողմից: Մեր պայքարը ոչ թե պայքար է իշխանության և ընդդիմության, այլ բարու ու չարի միջև: Պետությունը հիմնվում է իրավունքի ու արդարության վրա, և մենք կվերականգնենք Ադրբեջան պետությունը»,- ասել է Խազին: