Իսրայելի նախագահը ճանաչել է Հայոց ցեղասպանությունը. Haaretz

Իսրայելի նախագահ Ռեուվեն Ռիվլինը, ով երեկ՝ հունվարի 28-ին, Հոլոքոստի հիշատակին նվիրված ելույթ է ունեցել ՄԱԿ-ի Գլխավոր ասամբլեայում, կարծես ճանաչել է Հայոց ցեղասպանությունը. գրում է Asbarez-ը` վկայակոչելով իսրայելական Haaretz-ը:

Մարդու իրավունքների իսրայելցի ակտիվիստ և Հայոց ցեղասպանության ճանաչման կողմնակից Յարոն Վեյսն Asbarez-ին տրամադրել է Ռիվլինի` եբրայերենով ասված խոսքերը` Յոաֆ Լոֆի թարգմանությամբ:

Ռիվլինը, մեջբերելով 1915 թվականին՝ Հայոց ցեղասպանության օրերին, «Նիլի»-ից (հրեական լրտեսական ցանց` Պաղեստինում) Ցեղասպանության վերաբերյալ Ավշալոմ Ֆեինբերգի խոսքերը, ասել է. «Ֆեինբերգը դա գրել է ուղիղ 100 տարի առաջ: Կասկածի և հերքման 100 տարի: Այն տարիների Իսրայելում, որտեղ ես ծնվել եմ, ոչ ոք չէր հերքում կատարված սպանությունը: Երուսաղեմի բնակիչները, իմ ծնողները տեսել են նրանց` հազարներով գալու ժամանակ՝ սոված, փայտեր այրելով: Երուսաղեմում նրանք ապաստան գտան, և մինչ օրս նրանց ժառանգները ապրում են այնտեղ»:

Իսրայելի նախագահը եզրափակել է իր խոսքերը հետևյալ հայտարարությամբ. «Այսօր մենք պետք է մեզ անկեղծ հարց ուղղենք՝ արդյո՞ք մեր պայքարը, այս Ասամբլեայի պայքարը ցեղասպանություն երևույթի դեմ բավարար արդյունավետ է: Արդյունավե՞տ էր արդյոք այն Բոսնիայում: Արդյունավե՞տ էր այն Խոջալուի սպանությունները կանխելու համար»: