Հրավիրում ես ճաշկերույթի, հետո մարդկանց դատում ես, դա առնվազն անբարոյականություն է. ազատամարտիկը՝ Լեւոն Երանոսյանի մասին

Այսօր Եռաբլուրում ազատամարտիկների հավաքի ժամանակ ելույթ ունեցավ վերջերս ծեծի ենթարկված ազատամարտիկ Ռազմիկ Պետրոսյանը: Նա նշեց, որ ազատամարտիկների հավաքի առիթը ոչ ոք չէր կարող կանխատեսել:

«Վերջին շրջանում ազատամարտիկների հանդեպ սկսված բռնությունների շարանը ստիպեց, որ մենք հավաքվենք ու ներազդենք նրանց վրա, ովքեր վախի մթնոլորտ են փորձում ստեղծել: Մենք՝ ազատամարտիկներս, մեր կեցվածքով միշտ եղել ենք զսպաշապիկ նման խմբավորումների համար»,- ասաց Ռազմիկ Պետրոսյանը:

Նա նշեց, որ իրենց հետ կատարված միջադեպի մասին իրենք որոշել էին չբարձրաձայնել, բայց երբ «իրենց ընկերը` փոխոստիկանապետ Լյովա Երանոսյանը, նման հայտարարություններով հանդես եկավ ու նսեմացրեց ազատամարտիկներին, ուրեմն լռել այլևս չեն կարող»:

«Լևոն  Երանոսյանի հայտարարությունը մեզ ցավ պատճառեց, որովհետև եթե հրավիրված ես ճաշկերույթի, ու հետո մարդկանց դատում ես, դա առնվազն անբարոյականություն է: Հիմա հայտարարում եմ, որ բռնության գործողությունները կազմակերպված են, ու եթե դրանք չկանխվեն ու չբացահայտվեն, ուրեմն ասեմ` իմացեք, մեզ հնարավոր չի վախեցնել: Մենք այսօր ավելի քան միասնական ենք ու զորավիգ ենք լինելու մեր ազգին»,- ասաց Ռազմիկ Պետրոսյանը:

Ազատամարտիկ Մուշեղ Սաղաթելյանը նշեց. «Ինչի՞ ենք լռվել, ես չեմ հասկանում: Չեմ ասում` հայը հային պետք է գնա սպանի, բայց պետք է բռունցք դառնալ ու ասել, որ սխալ եք կառավարում երկիրը և ուժի գործադրմամբ փորձում եք վախեցնել: Ուրեմն ինչո՞ւ ենք խոսում պատերի տակ, բայց չենք միավորվում Ազատության հրապարակում: Չի կարելի թույլ տալ, որ մեզ նսեմացնեն»: