Այս իշխանությունների սահմանադրական բարեփոխումը Լիսկային վերանշանակելն էր. Արմեն Մարտիրոսյան

Այսօր Սիսիանում մեկնարկած` երեք քաղաքական ուժերի կողմից կազմակերպված հանրահավաքում ելույթ ունեցավ «Ժառանգություն» կուսակցության փոխնախագահ Արմեն Մարտիրոսյանը, ով խոսեց մի քանի օր առաջ Սյունիքի մարզպետի պաշտոնում Սուրիկ Խաչատրյանի վերանշանակման մասին:

«Այս իշխանությունների սահմանադրական փոփոխությունը հետևյալն է` Լիսկային նորից նշանակեցին Սյունիքի մարզպետ, իրենց բարեփոխումը դա է: Այս իշխանությունները ոչ արտաքին քաղաքական  ճակատում են հաջողության հասնում, ոչ էլ ներքին ճակատում, որովհետև վերանշանակում են Սուրիկ Խաչատրյանին Սյունիքի մարզպետի պաշտոնում: Երկիրը դրել են ֆեոդալացման ճանապարհի վրա, ուստի մեզ այլ բան չի մնում,  քան ամբողջական իշխանափոխություն անել»,- ասաց Արմեն Մարտիրոսյանը:

Նա նշեց, որ կառավարության նոր հարկային  քաղաքականության արդյունքում ՓՄՁ-ները  բողոքի ալիք են բարձրացրել Երևանում: «Մեծերին թողած` ընկնում են փոքրի հետևից, որ ի՞նչ անեն,  չգիտե՞ն, թե ով է, որ փաստաթուղթ չի տրամադրում: Հայաստանն ընդամենը երեք ավտոճանապարհ ունի, եթե դուք նորմալ աշխատում եք այդ երեք մաքսակետում, էդ ստվերը որտեղի՞ց պետք է լինի, թե՞ դա ձեր ստվերն է: Դուք եք անմիջականորեն մասնակիցը այդ ստվերի` կառավարությունն իր կազմով, չեմ ասի ամբողջ կազմով, որովհետև կառավարության կազմում կան մարդիկ, որ բիզնեսով չեն զբաղվում: Ուրեմն ումից ի՞նչ փաստաթուղթ եք ուզում, եթե խոշոր ստվերի ներկայացուցիչները կառավարության կազմում են»,- ասաց Արմեն Մարտիրոսյանը:

Նա նշեց, որ համապետական ընտրություններից առաջ իշխանությունները խաբեցին ժողովրդին, թե գազը չի թանկանալու, այնինչ ընտրություններից հետո պարզվեց,  որ գազը վաղուց էր թանկացել: Արմեն Մարտիրոսյանը հայտարարեց, որ ժողովուրդն ունի եզակի հնարավորություն՝ անելու իշխանափոխություն, որովհետև աննախադեպ ձևով միավորվել են քաղաքական տարբեր ուժեր:

«Կառավարությանը դնում ենք մի կողմ, կառավարությունը երբեք ոչինչ չի արել ու չի էլ անելու, որովհետև դա հենց նույն ոչ լեգիտիմ  իշխանության կառավարությունն է»,-  ասաց Արմեն Մարտիրոսյանը՝ հավելելով, որ նպատակն այսուհետ իշխանափոխությունն է: