Փոխոստիկանապետը հրահանգեց փողոցը «մաքրել» ցուցարարներից և հրեց քաղաքացուն

Այսօր առավոտից ՀՀ կառավարության շենքի առջեւ բողոքի ակցիա իրականացնող առևտրականները, ովքեր իրենց դժգոհությունն էին հայտնում հոկտեմբերի 1-ից ուժի մեջ մտնող «Շրջանառության հարկի մասին» օրենքում կատարված փոփոխություններից, քիչ առաջ փակել էին Տիգրան Մեծի փողոցի` Հանրապետության հրապարակին հարող հատվածն ու Նալբանդյան փողոցի մի մասը: Դրա արդյունքում երթևեկությունը կաթվածահար էր եղել: Ցուցարարները սպառնում էին իրենց պահանջները չկատարելու դեպքում փակել նաև հրապարակ մտնող մյուս փողոցները:

Իրավիճակն այնքան էլ լարվել, որ հրապարակ էին ժամանել Հայաստանի ոստիկանապետի տեղակալ Սամվել Հովհաննիսյանը, Երևանի ոստիկանապետ Աշոտ Կարապետյանը, նրա տեղակալ Վալերի Օսիպյանը:

Մինչ այդ քաղաքացիների հետ զրույցում ՀՀ կառավարության ներկայացուցիչ Ալեքսանդր Ղազարյանը քաղաքացիներից մեկին դիտողություն էր արել ագրեսիվ պահվածքի համար` ասելով. «Հո տեռորիստ չես»:

Սակայն, ինչպես պարզվեց, ոչ պակաս ագրեսիվ էին տրամադրված նաև իշխանության ներկայացուցիչները: Մասնավորապես` ՀՀ ոստիկանապետի տեղակալ Սամվել Հովհաննիսյանը բարկացավ կառավարության շենքի առջեւ  ծառայություն իրականացնող ոստիկանների վրա և նրանց հրահանգեց քաղաքացիներից «մաքրել» փողոցը: «Փողոցը շտապ մաքրեք, շտապ: Բոլորին հանում եք դուրս»,- ասաց նա, ապա հրեց իրեն ընդդիմացող քաղաքացուն:

Մանրամասները` yerkir.am-ի տեսանյութում: