Կառավարությունը կոչ է անում պաշտոնատար անձանց` դիմել դատարան, երբ իրենց վիրավորում են քաղաքացիները կամ լրագրողները

Այսօր կառավարության նիստում ՀՀ արդարադատության նախարար Հովհաննես Մանուկյանը զեկուցեց մի հանձնարարականի մասին, որը տվել էր վարչապետ Հովիկ Աբրահամյանը` որոշելու համար, թե ինչպիսի օրենսդրական փոփոխություններ են անհրաժեշտ, որպեսզի պաշտպանվեն քաղաքական գործիչների և պաշտոնյաների սահմանադրական ազատությունները և կանխվեն զրպարտանքի հնարավոր դրսևորումները հանրային միջոցառումների ընթացքում:

Արդարադատության նախարարը նշեց, որ կատարվել են ուսումնասիրություններ, այդ թվում ուսումնասիրվել է միջազգային փորձը և ոստիկանության հետ մշակվել է համատեղ կարծիք հանձնարարականի վերաբերյալ:

Ըստ այդմ` խոսքի իրավունքի իրացման սահմանադրական իրավունքը կարևոր է, որով պետք է պարզել, թե որտեղ է ավարտվում խոսքի ազատությունը և սկսվում մյուսի անձնական և ընտանեկան կյանքը, նաև պատիվն ու արժանապատվությունը հարգելու պարտականությունը,  և ինչպես կարող է պետությունը արձագանքել հանրային միջոցառումների ու հավաքների ժամանակ հանրային ու քաղաքական գործիչների իրավունքներն ու ազատությունները խախտող գործողություններին` նրանց հասցեին հնչած վիրավորական արտահայտությունների դեպքում:

Արդարադատության նախարարը ներկայացրեց մի քանի երկրների` Սերբիայի, Իսպանիայի, Վրաստանի ու  Նիդեռլանդների փորձը, ինչպես նաև Եվրոպական դատարանի որոշւմներից մի քանիսը, ըստ որոնց` քաղաքական գործիչը, ինչպես յուրաքանչյուր այլ անձ, ունի անձնական կյանքի պաշտպանության իրավունք:

Հանրային խոսքի ազատության իրավունքը չպետք է սահմանափակվի բոլոր այն դեպքերով, երբ սուր քննադատությունը բխում է քաղաքական իրավիճակից, քննարկվող հարցի հանրային կարևորությունից և նպատակ չունի վիրավորել քաղաքական ու պետական գործիչին` որպես անհատի: Նախարարն առաջարկեց դատավորների ու փաստաբանների համար այս խնդրի առնչությամբ կազմակերպել վերապատրաստման դասընթացներ ու ծրագրեր:

ՀՀ գլխավոր դատախազ Գևորգ Կոստանյանը նշեց, որ Հայաստանում պետք է այնպիսի պրակտիկա ձևավորվի, որ պաշտոնատար անձինք չկաշկանդվեն իրենց պատիվն ու արժանապատվությունը պաշտպանելու համար դատարան դիմելու հարցում:

«Մինչև մենք դա չանենք, ուզում եք` առավոտից իրիկուն դատավորներ ու փաստաբաններ վերապատրաստեք: Մարդը պետք է դիմի դատարան, որ փաստաբանն ու դատավորը դատական պրակտիկա ու նախադեպ ձևավորեն»,- ասաց Գևորգ Կոստանյանը:

Նա կոչ արեց նաև լրագրողական հանրույթին ինքնակազմակերպվել այնպես որ սահմանի ու պահպանի էթիկական որոշակի նորմեր: