Անհրաժեշտ է, որ ոստիկանության կողմից բռնության ենթարկված լրագրողները դիմեն դատարան

Այսօր Հելսինկյան ասոցիացիայի փաստաբան Ռոբերտ Ռևազյանը և փաստաբան Գրիշա Բալասանյանը, խոսելով Բաղրամյան պողոտայում ցույցը ցրելիս ոստիկանական բռնությունների մասին, լրագրողներին ասացին, որ ոստիկանությունն ապօրինի քայլեր է կատարել, մասնավորապես` ժամերով սպասեցրել է փաստաբաններին` թույլ չտալով հանդիպել վստահորդների հետ, մարդկանց փորձաքննություն են նշանակել` նրանց կամքին հակառակ, մանավանդ, երբ բերման ենթարկվածները եղել են վկայի կարգավիճակում. վկաները չէին կարողանում ազատ ելումուտ անել:

«Այն գեղեցիկ տեսահոլովակները, որոնք ցույց է տալիս ոստիկանությունը, երեկվա գործողություններով նրանք կես ժամում այդ ամենը լցրեցին ջուրը: Այն գումարները, որ ծախսվել են ոստիկանական համակարգում, այն բարեփոխումները, որի մասին թմբկահարում է ոստիկանությունը, իրականությանը չեն համապատասխանում, ոստիկանները շատ հեռու են «հրեշտակ» կոչվելուց»,- ասաց Գրիշա Բալասանյանը` հորդորելով լրագրողներին, ովքեր բռնության են ենթարկվել, դիմել դատարան: