Պաշտպանության նախարարը, ԱԺ նախագահն ու մի խումբ պատգամավորներ դիրքերում են

Այս պահին ՀՀ Պաշտպանության նախարար Սեյրան Օհանյանը, ԱԺ նախագահ Գալուստ Սահակյանը և ԱԺ 6 խմբակցությունների մեկական ներկայացուցիչներ գտնվում են Տավուշի մարզի սահմանային դիրքերում:

Պատգամավորների թվում են «Ժառանգությունից»` Ռուբեն Հակոբյանը, ՀՀԿ-ից` Գագիկ Մելիքյանը, ԲՀԿ-ից` Գուրգեն Արսենյանը, ՀՅԴ-ից` Արմեն Ռուստամյանը, ՕԵԿ-ից` Իշխան Խաչատրյանը և ՀԱԿ-ից Լևոն Զուրաբյանը:

Yerkir.am-ի հետ զրույցում ԱԺ «Ժառանգություն» խմբակցության ղեկավար Ռուբեն Հակոբյանը նշեց, որ իրենք արդեն եղել են Տավուշի մարզի Մովսես գյուղում և հանդիպել տեղի բնակիչների հետ, իսկ այժմ գտնվում են սահմանապահ դիրքերից մեկում: Պատգամավորը հիշեցրեց, որ այսօրվա այցը նախօրոք ձեռքբերված պայմանավորվածության արդյունքն է:

Հիշեցնենք, որ խորհրդարանական 6 ուժերը վերջին շրջանում սահմանում տիրող իրավիճակի վերաբերյալ հանդես էին եկել հայտարարությամբ, ինչպես նաև պայմանավորվել էին միասին այցելել ԼՂՀ-ի և ՀՀ-ի հյուսիսարևելյան շրջաններ: