Կաշառք վերցնողին մեղադրանք առաջադրվել է, տվողին` ոչ

Փաստաբան Արշավիր Խալափյանի հանդեպ մեղադրանք է առաջադրվել` ՀՀ քրեական օրենսգրքի 200 հոդվածի 3-րդ մասով (առեւտրային կաշառք ստանալը): Նրա հանդեպ որպես խափանման միջոց կիրառվել է կալանքը:

Փաստաբանի պաշտպանությամբ սկսել են զբաղվել չորս այլ փաստաբաններ, որոնց թվում է Փաստաբանների պալատի խորհրդի անդամ Գևորգ Գյոզալյանը: Վերջինս Yerkir.am-ի հետ զրույցում ասաց, որ առաջդրված մեղադրանքի հետ համաձայն չէ, սակայն ավելի մանրամասն կարծիք կարող է հայտնել գործի նյութերին խորապես ծանոթանալուց հետո:

Իսկ ավելի ուշ նա իր ֆեյսբուքյան էջում գրել էր, որ Արշավիր Խալափյանի գործով մասնակի հաջողություն է գրանցվել. «Թեև դատարանը բավարարել է կալանքի միջնորդությունը, այդուհանդերձ կիրառել է նաև գրավի հնարավորություն 1.000.000 դրամի չափով: Հայկական իրականության մեջ կարծում եմ սա կարելի է համարել հաջողություն: Մնաց գումարի հարցը»:

Այս գործում տարօրինակ է այն, որ Արշավիր Խալափյանի հանդեպ մեղադրանք է առաջադրվել, կալանք կիրառվել, սակայն դեռևս որևէ խոսք չկա կաշառք տվողի մասով: