Կհաստատվի հաշմանդամություն ունեցող անձանց սոցիալական ներառման 2017-2021 թթ. ծրագիրը

Կառավարության վաղվա նիստի օրակարգում աշխատանքի և սոցիալական հարցերի նախարարությունը ներառել է հաշմանդամություն ունեցող անձանց սոցիալական ներառման 2017-2021 թվականների համալիր ծրագրին հավանություն տալու մասին հարցը:

Ընթացիկ վիճակի հետ կապված նախարարությունը նշում է, որ 2010թ. Կոնվենցիայի վավերացումից հետո տարբեր ոլորտներում իրականացվում են միջոցառումներ` ուղղված հաշմանդամություն ունեցող անձանց հավասար և մատչելի պայմաններ ապահովելուն, նրանց հիմնարար իրավունքների և ազատությունների պաշտպանությանը: Այնուամենայնիվ, դրանք բավարար և համակարգված չեն: Հաշմանդամություն ունեցող անձանց համար  ապահովված չեն մատչելի պայմաններ, ինչը լուրջ խոչնդոտ է հանդիսանում նրանց սոցիալական ներառման համար: Անհրաժեշտ է միջոլորտային ակտիվ համագործակցության շնորհիվ ձեռնարկել հաշմանդամություն ունեցող անձանց սոցիալական ներառումն ապահովող անհրաժեշտ միջոցառումներ:

Նախագծի  նպատակն է` ամրագրել հաշմանդամություն ունեցող անձանց սոցիալական ներառմանն ուղղված հիմնական ուղղությունները, հասարակական կյանքի բոլոր ոլորտներում հաշմանդամություն ունեցող անձանց սոցիալական ներառումն ապահովող համապարփակ  միջոցառումների և ծրագրերի ցանկը:

 Նախագծի ընդունումը անհրաժեշտ իրավական հիմք հաշմանդամություն ունեցող անձանց սոցիալական ներառմանն ուղղված միջոցառումներ իրականացնելու, ինչպես նաև  Հայաստանի Հանրապետության ստանձնած միջազգային պարտավորությունները կատարելու համար: Բացի այդ կիրականացվեն գործնական միջոցառումներ` ուղղված հասարակական կյանքի բոլոր ոլորտներում հաշմանդամություն ունեցող անձանց համար հավասար և մատչելի պայմաններ  ապահովելուն: