Հայաստանում բացվեց Շվեդիայի դեսպանությունը

Հունիսի 13-ին արտգործնախարար Էդվարդ Նալբանդյանն ընդունեց Երևանում գտնվող Շվեդիայի առևտրի նախարար Էվա Բյորլինգին:

Ողջունելով հյուրին` նախարար Նալբանդյանը նշեց, որ Հայաստանը կարևորում է Շվեդիայի հետ հարաբերությունների զարգացումը և Շվեդիայի` Երևանում դեսպանություն հիմնելու որոշումը: Էդվարդ Նալբանդյանը հատկանշական համարեց, որ նախարար Բյորլինգը ժամանել է շվեդ գործարարների ներկայացուցչական պատվիրակության ուղեկցությամբ։

Շնորհակալություն հայտնելով ընդունելության համար` նախարար Բյորլինգը ասաց, որ ուրախ է այցելել Երևան՝ Շվեդիայի դեսպանատան բացման և գործարար համաժողովի անցկացման կապակցությամբ, ինչը նոր խթան կհաղորդի երկկողմ համագործակցությանը:

Հանդիպման օրակարգում էին միջազգային կազմակերպություններում համագործակցության սերտացման, առևտրատնտեսական կապերի աշխուժացման, կրթական և մշակութային ոլորտներում փոխանակումների ակտիվացման, իրավապայմանագրային դաշտի ընդլայնման, Հայաստան - Եվրամիություն փոխգործակցության հարցեր։

Նույն օրը` երեկոյան, արտգործնախարար Էդվարդ Նալբանդյանը և Շվեդիայի առևտրի նախարար Էվա Բյորլինգի ներկայությամբ տեղի ունեցավ Երևանում Շվեդիայի դեսպանատան բացման հանդիսավոր արարողությունը։ Այս մասին հայտնում է ՀՀ արտգործնախարարության կայքը: