Ռուսաստանը չի ծրագրում վերածնել ԽՍՀՄ-ը. Պուտին

Պնդումներն այն մասին, որ Ռուսաստանը փորձում է հետխորհրդային տարածքում հաստատել իր ազդեցությունը, սխալ են և որպես գործիք են կիրառվում տեղեկատվական պատերազմում: Այս մասին ասել է Ռուսաստանի նախագահ Վլադիմիր Պուտինն այսօր՝ Սանկտ Պետերբուրգում համաշխարհային լրատվական գործակալությունների ղեկավարների հետ հանդիպման ժամանակ:

«Մեր վզին փորձում են փաթաթել այն պիտակը, թե մենք պատրաստվում ենք վերականգնել կայսրությունը՝ Խորհրդային Միությունը, բոլորին ենթարկել մեր ազդեցությանը: Դա բացարձակապես չի համապատասխանում իրականությանը»,- Պուտինի հայտարարությունն է փոխանցում РИА Новости-ն:

Պուտինի խոսքով՝ Եվրասիական տնտեսական միության մասին համաձայնագրի նախագծում ևս չկա որևէ բան, որը կվկայեր ԽՍՀՄ-ի վերաստեղծման ծրագրի մասին: Ռուսաստանի նախագահը վստահեցրել է, որ այդ համաձայնագիրը բացառապես տնտեսության ոլորտում ջանքերի մեկտեղման մասին է: