Կալիֆոռնիայի ողբերգական հրաձգության մեջ կասկածում են կանանցից մերժված տղայի

Մայիսի 24-ին Կալիֆոռնիայում 7 մարդ է սպանվել հրաձգության հետևանքով, նույնքան մարդ վիրավորվել է: Ականատեսների խոսքով՝ մի տղամարդ ԲՄՎ ավտոմեքենայի լուսամուտից կրակ է բացել անցորդների ուղղությամբ: Կասկածյալին ևս հրազենից սպանված են գտնել մեքենայի ղեկի առջև:

Lenta.ru-ի տեղեկացմամբ՝ ԱՄՆ ոստիկանությունը ստուգում է հրաձգությանն Էլիոթ Ռոջեր անունով տղամարդու առնչությունը, որը միջադեպից մեկ օր առաջ youtube-ում տեղադրել էր տեսանյութ: Տեսանյութում Ռոջերը սպառնացել է վրեժ լուծել կանանցից, քանի որ նրանք ուշադրություն չեն դարձնում իրեն: Ոստիկանության ներկայացուցիչ Բիլ Բրաունը Keyt TV հեռուստաընկերության հետ զրույցում հաստատել է, որ Էլիոթ Ռոջերի տեսանյութը «կապ ունի կատարվածի հետ»:

«Էլիոթ Ռոջերի հատուցումը» վերնագրված տեսանյութում երիտասարդն ասում է, որ 22 տարեկանում դեռ որևէ սիրային կապ չի ունեցել, և դրա, ինչպես նաև իր մյուս տառապանքների համար շուտով վրեժ կլուծի կանանցից և սիրո հարցում հաջողակ տղամարդկանցից: