Սկրյաբինի անվան միջազգային մրցույթի հաղթողը հայուհի է

Երևանի Միքայել Մալունցյանի անվան արվեստի դպրոցի աշակերտուհի Լիլյա Առաքելյանը օրերս Փարիզում մասնակցել է Ալեքսանդր Սկրյաբինի անվան դաշնակահարների 14-րդ միջազգային մրցույթին: Երիտասարդ դաշնակահարուհին արժանացել է 1-ին մրցանակի և մասնակցել Փարիզի «Ադվար» թատրոնի դահլիճում կայացած մրցույթի գալա համերգին:

Լիլյա Առաքելյանը սովորում է պրոֆեսոր Վաղարշակ Հարությունյանի դասարանում: 2012-ին երաժիշտ կատարողների «Ֆլամ» միջազգային 23-րդ մրցույթի միջին տարիքային խմբում Լիլյան արժանացել էր 1-ին մրցանակի: Նա Հայաստանի «Նոր անուններ» ծրագրի անդամ է, որի շրջանակում 2010-ին համերգով հանդես է եկել Ֆրանսիայում, իսկ 2013-ին` Բուլղարիայում: