Բռնցքամարտի աշխարհի առաջնություն. հաջող մեկնարկ Սոֆիայում

Բուլղարիայի մայրաքաղաք Սոֆիայում ընթացող` բռնցքամարտի երիտասարդների աշխարհի առաջնության մեկնարկային օրը հաղթական էր հայ բռնցքամարտիկների համար:

Ռինգ դուրս եկած մեր երկու բռնցքամարտիկները՝ 46-49 կգ քաշային կարգում հանդես եկող Արթուր Հովհաննիսյանը և 52 կգ քաշային Արսեն Պողոսյանը, իրենց մենամարտերն ավարտեցին հաղթանակով: Արթուր Հովհաննիսյանը առավելության հասավ կորեացի Կիմ Ուոնհոյի նկատմամբ, իսկ Արսեն Պողոսյանը պարտության մատնեց նիգերիացի Այանկոլ Օկեյջեմիին: Ընդ-որում` մեր երկու բռնցքամարտիկներն էլ հաղթեցին բացահայտ առավելությամբ:

Տեղեկացնենք, որ Արթուր Հովհաննիսյանը իր երկրորդ մենամարտը կանցկացնի ապրիլի 19-ին և կմրցի իռլանդացի Իրվին Բրենդանի հետ: Արսեն Պողոսյանի մրցակիցը կլինի Իսպանիան ներկայացնող Գաբրիել Էսկոբարը: Մենամարտը կկայանա ապրիլի 17-ին, իսկ վաղը՝ ապրիլի 15-ին, ասպարեզ դուրս կգա 56 կգ քաշային Հրայր Շահվերդյանը, ով կմենամարտի Թուրքիան ներկայացնող Ահմեդ Միցիկի հետ: