ՄԻՊ-ը շնորհակալություն հայտնեց Տիգրան Սարգսյանին

Վարչապետի թեկնածուների շարքում հայտնվել է նաև Մարդու իրավունքների պաշտպան Կարեն Անդրեասյանի անունը: Հարցին, թե որքանո՞վ է համապատասխանում տեղեկությունն իրականությանը, լրագրողների հետ հանդիպման ժամանակ ՄԻՊ-ը պատասխանեց. «Կարծում եմ, որ դրանով փորձում են մեզ շեղել կարևոր խնդրից` մարդու իրավունքների պաշտպանությունից»:

Իսկ թե ո՞ւմ է ցանկանում տեսնել վարչապետի պաշտոնում, Կ. Անդրեասյանն ասաց, որ կպատասխանի այդ հարցին երեք տարի հետո, երբ այլևս օմբուդսմենի պաշտոնը զբաղեցնելիս չի լինի:

Նա նաև ասաց, որ թեև Տիգրան Սարգսյանի հետ աշխատելու ընթացքում խնդիրներ շատ են եղել, սակայն շնորհակալ է նրան այն բանի համար, որ այս տարվա փետրվարի 27-ին կառավարության կողմից հաստատվել է «Մարդու իրավունքների պաշտպանության ազգային ծրագիրը», որում ներկայացված է իրենց կողմից արված 109 առաջարկ: «Եթե նոր վարչապետն իրագործի այդ ծրագիրն, ապա մեր երկիրը Շվեյցարիայի նման երկիր կլինի»,- ասաց Կ. Անդրեասյանը:

Նա նշեց նաև, որ ներկայումս մարդու իրավունքների պաշտպանության առումով Հայաստանն ավելի  առաջադեմ է Հունգարիայից, և մեր դիրքերը բավականին առաջ են ԱՊՀ երկրների շարքում: