Հակառակորդը չի հանգստանալու մինչև օգոստոսի 9-ը և դրանից հետո. Սեյրան Օհանյանը շնորհակալություն հայտնեց ողջ հասարակությանը

Այսօր կառավարության նիստում ՀՀ Պաշտպանության նախարար Սեյրան Օհանյանը ներկայացրեց սահմանային լարվածության արդյունքում ստեղծված իրավիճակին և Պաշտպանության նախարարության իրականացրած միջոցառումներին:

Նախարարի խոսքով` առաջին հերթին զինված ուժերն առանց մարտական պատրաստականության բարձր աստիճանի բերելու ուժեղացրել են  իրենց  ծառայությունը և՛ սահմանամերձ հատվածում, և՛ ռեզերվային բոլոր զորամասերում:

Հրամանատարական կետերը, ղեկավարման ամբողջ համակարգը, միջոցներն ու օրգանները գործում են շուրջօրյա ռեժիմով, խոցման, ահազանգման, երկրորդ շարակազմի շատ-շատ ստորաբաժանումներ բերվել են մարտական պատրաստականության և գտնվում են անմիջապես առաջին գծում միանգամից ահազանգելու համար:  Հատկապես գիշերային պայմաններում ծառայության ռեժիմն ուժեղացված է:

Սեյրան Օհանյանը շեշտեց, որ ՀՀ ԶՈՒ  մարտական ոգին չափազանց բարձր է՝ առաջին հերթին արտահայտված այդ հաջողություններով, երկրորդը՝ բնակչության, հատկապես Կառավարության, ԱԺ-ի, հասարակության լայն խավերի և նաև մարտական ընկերների, ազատամարտիկների, երկրապահների, վետերանների աջակցությամբ, որոնք մասնակցում են մարտական հերթապահության և իրենց փորձի փոխանակմամբ ոգևորում են զինված ուժերի ստորաբաժանումներին: 

Սեյրան Օհանյանը դմելով ՀՀ վարչապետ Հովիկ Աբրահամյանին, ասաց. «Ես գտնում եմ, որ, պարոն վարչապետ, իրենք այս իրավիճակում չեն հանգստանալու մինչև օգոստոսի 9-ը և դրանից հետո, և ՀՀ ԶՈՒ-ն պատրաստ է  իրականացնել իր  առջև դրված խնդիրը: Այս պահին ես պարզապես նաև ուզում եմ իմ շնորհակալությունը հայտնել և´ կառավարության բոլոր անդամներին, և´ հասարակությանը: Անհրաժեշտության դեպքում աջակցությունը զինված ուժերին, մեր զինվորին, հատկապես զոհված և վիրավոր ազատամարտիկների և զինծառայողների ծնողներին, հարազատներին, այցելությունները պետք է մեր հանրության կողմից շարունակվեն, և նրանք մեր ուշադրության կենտրոնում պետք է լինեն: 
Շնորհակալություն»:

ՀՀ վարչապետ Հովիկ Աբրահամյանը ՀՀ  կառավարության անունից խորին ցավակցություն հայտնեց զոհված զինվորների  ծնողներին ու հարազատներին: Կառավարության անդամները  մեկ րոպե լռությամբ հոտնկայս հարգեցին  զոհված հերոսների հիշատակը: