ՀՀԿ-ական պատգամավորը հայտնեց Տիգրան Սարգսյանի հրաժարականի պատճառը եւ թե նախարարներից ով կփոխվի

ԱԺ ՀՀԿ խմբակցության պատգամավոր Վրեժ Մարկոսյանի համար վարչապետի պաշտոնում Հովիկ Աբրահամյանի թեկնածությունն ընդունելի է, քանի որ, ըստ պատգամավորի, նա ունի վարչապետի պաշտոնի համար անհրաժեշտ հատկանիշները: Yerkir.am-ի հետ զրույցում Մարկոսյանը նշեց, որ միայն դրական հատկանիշներ է տեսնում Հովիկ Աբրահամյանի մեջ:

«Եթե նա վարչապետ լինի, լավ կլինի, քանի որ նա շատ լավ գիտի ցածր խավին, միջին խավին ու ավելի շահագրգիռ կլինի աղքատ ժողովրդի շահերը պաշտպանելու համար»,- ասաց նա՝ հավելելով, որ շատ կցանկանար, որ ապագա վարչապետը զարկ տար փոքր ու միջին բիզնեսին, որովհետև հենց ինքը՝ Հովիկ Աբրահամյանը, սկսել է զրոյից ու աճել:

Մարկոսյանը չի կարծում, թե, Հովիկ Աբրահամյանին վարչապետ նշանակելով,  կկասեցվի ԲՀԿ-ի պայքարը: Ըստ նրա` եթե ԲՀԿ-ն կոալիցիային մաս կազմի, բնականաբար, ԲՀԿ-ի պայքարը կկասեցվի, իսկ կոալիցիային մաս չկազմի, ապա կշարունակի պայքարը: «Եվ խնամիական կապերն էլ դեր չեն ունենա: Շատ հնարավոր է, որ ԲՀԿ-ն շարունակի պայքարը: Ամեն ինչ էլ հնարավոր է, ոչինչ բացառել չես կարող»,- ասաց ՀՀԿ-ական պատգամավորը:

Ինչ վերաբերում է Տիգրան Սարգսյանի հրաժարականի դրդապատճառներին, ՀՀԿ-ական պատգամավորը կարծում է, որ դրանում դեր է խաղացել ոչ իշխանական չորս ուժերի համատեղ պայքարը կառավարության դեմ: Վրեժ Մարկոսյանը նաև նշեց, որ, իր կարծիքով, կառավարության կազմում կլինեն փոփոխություններ: «Երևի ֆինանսների նախարարը կփոխվի»,- ասաց նա:

Հարցին՝ ֆինանսների նախարարը կփոխվի, որովհետև վարչապետի սանի՞կն է, պատգամավորը պատասխանեց. «Երևի»:

Ինչ վերաբերում է ազգային համաձայնության կառավարության ձևավորմանը և դրանում ոչ իշխանական ուժերի ընդգրկմանը, Վրեժ Մարկոսյանը նշեց. «Դա ոչ ոք չի կարող ասել, մինչև չնշանակվի վարչապետը: Իհարկե, ցանկալի է, որ ընդդիմությունը մաս կազմի ազգային համաձայնությանը, ինձ թվում է՝ վատ չէր լինի»: