Աստված չանի, որ Հայաստանում նորից արտակարգ դրություն լինի. Հրայր Թովմասյան

«Բանակի մասնակցությունը Սահմանադրությամբ նախատեսված է, եւ դուք արտակարգ դրությունը շփոթում եք, թե կարող է ընդամենը հանրահավաք լինել: Արտակարգ դրությունը շատ ավելի խորը բան է, եւ Աստված չանի, որ Հայաստանում երբեւէ նորից արտակարգ դրություն լինի»,- կառավարության նիստից հետո լրագրողներին ասաց արդարադատության նախարար Հրայր Թովմասյանը` անդրադառնալով արտակարգ դրության ժամանակ բանակի մասնակցությանը:

ՀՀ կառավարությունն այսօր բացասական եզրակացություն տվեց ԱԺ ՀԱԿ խմբակցության պատգամավորների օրենսդրական նախաձեռնությանը` «Արտակարգ դրության իրավական ռեժիմի մասին» օրենքում փոփոխություններ եւ լրացումներ կատարելու օրինագծին:

Այս նախաձեռնությամբ պատգամավորները նախ առաջարկում էին արտակարգ դրության պայմաններում զինված ուժերի օգտագործման միանգամայն այլ ռեժիմներ: Մասնավորապես` ըստ նախաձեռնության` առաջարկվում է բանակը որպես զուտ մարդկային ուժ օգտագործել, այն էլ` արտակարգ իրավիճակների պայմաններում: Այս դրույթի կապակցությամբ Հրայր Թովմասյանը նշեց, թե օրենքով նախատեսված դրույթն ուղղակիորեն բխում է Սահմանադրության 8.2 հոդվածից, համաձայն որի` մեր զինված ուժերը, բացի տարածքային ամբողջականությունից, ապահովում են նաեւ երկրի անվտանգությունը, որը ներառում է նաեւ ներքին անվտանգությունը:

Երկրորդ հարցը վերաբերում էր պարետատանը` որպես պետական մարմնի` դրա` Սահմանադրությամբ նախատեսված չլինելը, եւ պատգամավորները օրենքով նման մարմնի ձեւավորումը համարում են հակասահմանադրական: Այս դրույթի կապակցությամբ էլ Հրայր Թովմասյանը նշեց. «Մեր դիրքորոշումն այն է, որ սա մեկ առանձին մարմին չէ, այլ ընդամենը զբաղվում է արտակարգ դրության ռեժիմի ապահովման ուժերի համակարգմամբ»:

Նախաձեռնության մեջ երրորդ հարցով պատգամավորները անդրադառնում էին արտակարգ դրության ժամանակ վարչական ձերբակալումներին: Այստեղ միգուցե, նշեց արդարադատության նախարարը, նախագծի հեղինակներին շփոթության մեջ է գցել «ձերբակալում» տերմինը, բայց սա, ըստ նրա, ոչ թե ձերբակալում է քրեակատարողական իմաստով, այլ Սահմանադրության 16-րդ հոդվածի 3-րդ կետի իմաստով: «Վարչական իրավախախտումների իմաստով, որ արտակարգ դրության ռեժիմի պայմանները խախտողներին այլ կերպ, այլ միջոց, այլ գործիք չկա, քան նրանց ազատությունը որոշակի սահմանափակելը, ինչն ուղղակիորեն բխում է Սահմանադրության 16-րդ հոդվածի երրորդ կետից, ըստ որի` անձի ազատությունները կարող են սահմանափակվել` օրենքով նրա վրա դրված պարտավորությունների ապահովման նպատակով»,- պարզաբանեց Հրայր Թովմասյանը:

Այսպիսով` կառավարությունը օրենսդրական նախաձեռնությանը բացասական եզրակացություն տվեց: