ԼՂ հարցում միայն բանակցային գործընթացով սահմանափակվելու կարիք չկա

Հայաստանի եւ Ադրբեջանի նախագահների` Վիեննայում կայացած հանդիպումը բանակցային գործընթացում փոխեց այն, որ նրանք երկու տարի էր` չէին հանդիպում ու հանդիպեցին. լրագրողներին այսօր ասաց ՀՅԴ Հայ Դատի եւ քաղաքական հարցերի գրասենյակի պատասխանատու Կիրո Մանոյանը:

Բայց թե դա գործնականում ի՞նչ կփոխի, ըստ նրա, կոնկրետ հիմք չկա ասելու, որ ինչ-որ բան կփոխվի: «Դրա համար էլ մենք կարիք չունենք սահմանափակվելու բանակցային գործընթացով: Մենք ասել ենք, կրկնում ենք, որ պետք է զուգահեռաբար երկու ուղղությամբ աշխատենք` գետնի վրա իրավիճակը ամրագրել-փոխել եւ ԼՂՀ-ի միջազգային ճանաչումն ապահովել` հնարավոր տարբեր աստիճաններով, մակարդակներով»,- ասաց Կիրո Մանոյանը' հավելելով, թե միայն դա է, որ իրապես կարող է ստիպել Ադրբեջանին լրջանալ ու ավելի լրջորեն մոտենալ բանակցային գործընթացին:

Իսկ «գետնի վրա իրավիճակ ամրագրել-փոխել» ասելով` Կիրո Մանոյանը նկատի ունի ազատագրված տարածքներում ժողովրդագրական հարցեր լուծելը, զարգանալը եւ այլն: