Կորպորատիվ քարտեր` պետական գերատեսչությունների համար

Ֆինանսների նախարարության կողմից որոշ ծախսերի կատարման օպերատիվությունը ապահովելու նպատակով երբեմն անհրաժեշտություն է առաջանում վճարումները կատարել վարկային քարտային հաշիվների միջոցով: Դրա համար կառավարությունն այսօր որոշեց թույլատրել պետական գերատեսչությունների որոշ տեսակի ծախսերն իրականացնել բանկային քարտերի միջոցով:

Օրինակ, ինչպես նշեց նախագիծը ներկայացնող ֆինանսների  նախարար Դավիթ Սարգսյանը, եթե նախկինում ավիատոմս էր ձեռք բերվում ինտերնետով, ապա այդ դեպքում մրցույթ անցկացնելու կարիք չկա, քանի որ միանգամից ծառայություն մատուցողի կողմից է ձեռք բերվում այդ ավիատոմսը: Սակայն խնդիր էր առաջացել, որ պետական մարմինները պետք է բիզնես քարտեր ունենային, որպեսզի ինտերնետ ծառայություններից կարողանային օգտվել: Այժմ արդեն բոլորին թույլատրվում է այդ քարտերով նման գործառույթներ իրականացնել:

Այս որոշումով բյուջեների կատարման ընթացքում կանխիկ ձեւով կատարվող ծախսերը սահմանափակելու նպատակով առաջարկվում է նաեւ բյուջետային հիմնարկների աշխատաողների աշխատավարձը եւ դրան հավասարեցված վճարումները, բյուջեներով նախատեսված միջոցների հաշվին իրականացվող գործուղման ծախսերն ու տրամադրվող կրթաթոշակները հատկացնել բանկային վճարային քարտերին փոխանցման միջոցով:

Վարչապետ Տիգրան Սարգսյանը հետաքրքրվեց` իսկ այս պահի դրությամբ ո՞ր գերատեսչություններն ունեն համապատասխան քարտեր: Պարզվեց` նման քարտեր ունեն կառավարության, նախագահի եւ ԱԺ աշխատակազմերը: Մնացածը նման քարտեր ստանալու համար չեն դիմել, քանի որ համապատասխան թույլտվություն չի եղել: Վարչապետը դիմեց կառավարությանը` բոլորին առաջարկելով օգտվել այս հնարավորությունից եւ ունենալ կորպորատիվ քարտեր:

«Դա ձեզ հնարավորություն է տալու ավելի պարզեցված ընթացակարգերով իրականացնել գնումներ: Օրինակ' ավիատոմսերի գնումների ժամանակ միշտ հարց էր առաջանում, որ ընթացակարգերը խոչընդոտում են օպերատիվ գնումներ կատարելուն, իսկ այս կորպորատիվ քարտերով կարելի է վճարումներ իրականացնել»,- նշեց Տիգրան Սարգսյանը:

Վարչապետը հավելեց նաեւ, որ տարբեր ծառայությունների ու ապրանքների ձեռքբերման ժամանակ հնարավոր է օգտագործել այդ քարտերը,  բացի հատուկ ծառայություններից, իսկ մնացած բոլոր դեպքերում կանխիկ գործառույթները կփոխարինվեն քարտայինով: