Ցույցը ցուցադրելու համար է. Հայրիկյանի ակցիան կարճ կտեւի

Քիչ առաջ Բաղրամյան 26-ի առջեւ մեկնարկեց ԱԻՄ առաջնորդ Պարույր Հայրիկյանի կազմակերպած բողոքի ակցիան` ընդդեմ ՄՄ-ին անդամակցելու` նախագահի որոշման: Yerkir.am-ի թղթակիցը նախագահի նստավայրի մոտից հայտնում է, որ ակցիայի մասնակիցները կրում են «Վիլնյուս կամ հրաժարական», «Ոչ, պարտադրող ՄՄ-ին» գրությամբ պաստառներ:

Պարույր Հայրիկյանը նշել է, որ նախագահի նստավայրի մոտ է եկել ոչ թե որպես ԱԻՄ առաջնորդ, այլ եկել է ներկայացնելու ՀՀ բնակչության այն 70 տոկոսին, ովքեր, ըստ իրեն, դեմ են Մաքսային միությանը: Նրա կարծիքով` ՀՀ-ի միակ ընտրությունը ԵՄ-ին անդամակցելն է, որի կազմում կան 27 ժողովրդավար պետություններ, իսկ ՄՄ-ի կազմում երեք անորոշ դիկտատորական պետություններ են:

Հայրիկյանը հայտարարեց, որ ակցիան կտեւի մինչեւ աշխատանքային օրվա ավարտը, քանի որ, ըստ նրա, «ցույցը ցուցադրելու համար է»:

Նշենք, որ Հայրիկյանը երեք օր նման ակցիաներ է անելու նախագահի նստավայրի մոտ` ամեն օր մինչեւ ժամը 17:00-ն: