Դեթրոյթի հանրային հեռուստաընկերությունը Հայոց ցեղասպանության մասին վավերագրական ֆիլմեր է ցուցադրելու

Աղբյուրը՝ armeniangenocide100

Մարտի 16-ին Դեթրոյթի հանրային հեռուստաընկերության եթերում «Հայկական ժառանգության գիշեր» կանցկացվի, որի ընթացքում ցուցադրվելու են երկու վավերագրական կինոնկարներ՝ նվիրված Հայոց ցեղասպանության զոհերի հիշատակին ու ազգային երաժշտությանը:

Երաժիշտներ Արա Թոփուզյանը (քանոն) և Ջերի Գերջեկյանը (հարվածային գործիքներ) հանդես կգան ողջ երեկոյի ընթացքում. տեղեկացնում է Դեթրոյթի հանրային հեռուստաընկերությունը:

Մեկ ժամ տևող վավերագրական ֆիլմերից մեկը ներկայացնում է  հայ երաժշտության տեղի վարպետների սերունդների պատմությունները: Ֆիլմի պրոդյուսերն է երաժիշտ Արա Թոփուզյանը:

Ավանդական, հայկական ժողովրդական երաժշտությունը ներառում է գյուղական կյանքը նկարագրող բալլադներից մինչև հարսանեկան արարողությունների, համայնքային պարերի և ճաշկերույթների ընթացքում ներկայացվող պարային երգեր:

Այս ավանդույթները երաժիշտներին անցել են սերնդեսերունդ և 1915թ. Հայոց ցեղասպանության փրկվածներից: Ֆիլմում այցելում են Դեթրոյթի այն վայրերը, որտեղ ժամանակին հայտնի էր հայկական երաժշտությունը, ներկայացվում են նաև հազվագյուտ հարցազրույցներ տեղի երաժիշտների հետ:

«Հայոց ցեղասպանությունը»  պատմություն է Առաջին համաշխարհայինի ժամանակ օսմանյան թուրքերի ձեռքից մահացած ավելի քան 1.5 մլն հայերի մասին: Ֆիլմը պատրաստել է «Էմմի» մրցանակակիր Էնդրյու Գոլբերգը: Ֆիլմում խոսում են Նատալի Պորտմանը, Լաուրա Լիննին, Օրլանդո Բլումը, Էդ Հարիսը և այլք: Ներառված են նաև հարցազրույցներ Պուլիտցերյան մրցանակակիր, ՄԱԿ-ում ԱՄՆ դեսպան Սամանթա Փաուերի հետ, ինչպես նաև երբևէ չցուցադրված պատմական կադրեր: