ՄՄ-ի ճանապարհային քարտեզը դեկտեմբերին պատրաստ կլինի

 Նախքան կառավարության նիստը սկսելը ՀՀ վարչապետը նախ համառոտ ներկայացրեց նախօրեին Սանկտ Պետերբուրգ կատարած աշխատանքային այցի արդյունքները:

Հիշեցնենք, որ ՀՀ վարչապետը Սանկտ Պետերբուրգում մասնակցում էր Անկախ պետությունների համագործակցության (ԱՊՀ) մասնակից պետությունների կառավարությունների ղեկավարների խորհրդի հերթական նիստին։

Վարչապետը նշեց, որ Եվրասիական հանձնաժողովի չորս երկրների համաձայնությամբ ձևավորվել է աշխատանքային խումբ, որի նպատակն է քննարկել ՀՀ-ի անդամագրումը Մաքսային միությանը: Բելառուսի, Ղազախստանի, Ռուսաստանի և Հայաստանի մասնագետները կազմավորել են աշխատանքային խումբ, որը պետք է իրականացնի ճանապարհային քարտեզի ստեղծմանն ուղղված աշխատանքները:

«Մեր բոլոր գերատեսչություններին լարված աշխատանք է սպասվում, և մեզանից է կախված, թե ինչ ժամանակամիջոցում կավարտենք այդ աշխատանքները»,- ասաց վարչապետը: Նա նաև հավելեց, որ դեկտեմբերի 5-ին նախատեսված է աշխատանքային խմբի առաջին հանդիպումը, որի ընթացքում Հայաստանն, ըստ ոլորտների, պետք է ներկայացնի անելիքները, որպեսզի ճանապարհային քարտեզը արդեն դեկտեմբերին ներկայացվի նախագահների հաստատմանը:

Տիգրան Սարգսյանի խոսքով` Սանկտ Պետերբուրգում Բելառուսի, Ղազախստանի ու Ռուսաստանի վարչապետերի հետ եղել է հանդիպում, և նրանք խոստացել են օժանդակել Հայաստանին` ՄՄ անդամագրությանն ուղղված աշխատանքները իրականացնելու համար: