Արմեն Աշոտյանը կայցելի Վանաձոր` ուսանողների հետ զրուցելու

ՀՀ ԿԳ նախարար Արմեն Աշոտյանը այցելելու է Վանաձոր` զրուցելու ուսանողների հետ: Աայսօր լրագրողների հետ զրույցում այդ մասին հայտնեց ինքը` նախարարը, անդրադառնալով Ճարտարագիտական համալսարանի վանաձորյան մասնաճյուղի լուծարման հետ կապված խոսակցություններին:

Նախարարը հավաստիացնում է, որ իրենց գործողություններից որեւէ ուսանող չի տուժելու:

«Վանաձորի պոլիտեխնիկի տնօրենը եղել է ինձ մոտ, մենք զրուցել ենք: Ես պնդում եմ` ոչ մի ուսանող օդից կախված չի մնալու: Միակ մտահոգությունը ստեղծվելիք բուհում տեխնոլոգիական կրթության ապագա ունենալն է. Հայաստանին բավարար է մեկ մանկավարժական համալսարան, մնացածները պետք է իրենց ապագան փնտրեն ոչ միայն մանկավարժական մասնագիտությունների մեջ»,- ասաց Աշոտյանը:

Նախարարը նշեց նաեւ, որ բուհերի շենքերի վաճառքի մասին խոսակցություններն առնվազն ծիծաղելի են, քանի որ իրենք չեն պատրաստվում վաճառել ո'չ մանկավարժականի եւ ո'չ էլ պոլիտեխնիկի շենքերը:

Նա հավաստիացնում է` բուհերի միացումը վանաձորցիների պահանջն ու ակնկալիքն է: «Եթե վանաձորցիներն, իրոք, չեն ուզում այդ բարեփոխումները, մենք չենք անի դա»,- ասաց Աշոտյանը` հավելելով, որ բուհերի միավորման արդյունքում կրճատումներ կլինեն. «Ես, այո, ասում եմ, որ Հայաստանում չկա այնքան գիտամանկավարժական պոտենցիալ, որքան բուհ կա»: