Վերջը քեզ ծեծելու եմ. նախարարը` լրագրողին

«Հայկական ժամանակը» գրում է, որ երեկ կառավարության նիստից հետո արդարադատության նախարար Հրայր Թովմասյանը, տեսնելով մոտեցող լրագրողներին, միանգամից հայտարարեց. «Միայն մեկ հարց»։  

Լրագրողների հարցին ի պատասխան` Հայաստանում կոռուպցիան նվազե՞լ է, նախարարը բերեց երկու օրինակ. Իրավաբանական անձի գրանցումը պարզեցվել է, ծննդականն էլ կարելի է ստանալ առցանց, ու հայտարարեց. «Կարծում եմ` նվազել է»։

-Բա որ կոռուպցիան նվազել է, ինչո՞ւ մարդիկ դա չեն նկատում։ Հոռետե՞ս են, թե՞ Ձեր վատն են ուզում...

-Չեն նկատում, որովհետեւ մենք լրագրության, նաեւ լրագրության...

-Գաղջ մթնոլորտ ենք ստեղծում, չէ՞։

-Չէ... դուք ասացիք։ Նաեւ այն պատճառով, որ... լրագրությանը պետք է սենսացիա, լրագրությանը պետք են բացասական ինչ-որ բաներ։

-Միայն մե՞ր երկրի լրագրությանն է նման բաներ պետք։

-Հայ ժողովուրդը մի ունիկալ առանձնահատկություն ունի՝ բոլորը բոլորին մեղավոր են ճանաչում, բայց ոչ երբեք իրենց։

-Ասենք` ճապոնացիներն ուրիշ են, մենք ուրի՞շ ենք, հա՞...

-Շնորհակալություն, ցտեսություն։

-Նժդեհական դառնալուց հետո՞ եք այդ (որ մեր ազգը ունիկալ է-խմբ.) եզրակացությանը հանգել։

-Հայկ, վերջը քեզ ծեծելու եմ։

Խմբ. կողմից. ՀՀ գլխավոր դատախազությանը հորդորում ենք արդարադատության նախարարի վերջին արտահայտությունը չընդունել որպես բռնության իրական սպառնալիքի մասին հաղորդում։