Հովիկ Աբրահամյանը չի տեսել Իշխան Զաքարյանի առանձնատունը

«Եթե մենք հաշվի նստենք տեսակետների հետ, ապա կխճճվենք. տեսակետները շատ են ու շինծու»,- այսօր լրագրողների հետ զրույցում ասաց ԱԺ նախագահ Հովիկ Աբրահամյանը` պատասխանելով Իշխան Զաքարյանի թեկնածության վերաբերյալ հնչող տեսակետների եւ գնահատականների վերաբերյալ հարցին:

Նա նշեց, որ հնչում են բազմաթիվ քննադատություններ Իշխան Զաքարյանի ու ՎՊ-ի մասին, որոնք իրականությանը չեն համապատասխանում ու անհիմն են: Ուստի` այսուհետ ՎՊ-ն վեր է հանելու այն հարցերը, որոնք համապատասխանում են իրականությանը: Հովիկ Աբրահամյանը Իշխան Զաքարյանի ուշադրությունը բևեռել է այն բանի վրա, որ հիմնավորվեն գնահատականները:

ԱԺ նախագահի խոսքով` ԱԺ-ն չէ իրավապահ այն մարմինը, որ պետք է որոշում կայացնի կամ գնահատական տա բյուջեի չարաշահումների վերաբերյալ. ԱԺ-ն չարաշահումների վերաբերյալ փաթեթը ուղարկել է գլխավոր դատախազություն: Նա նաև նշեց, որ դեռևս դատախազությունից չեն եկել պատասխաններ: «Դա թաքցնելու հարց չի, դատախազությունից կգա պատասխան, մենք կտանք գնահատականներ»,- ասաց Հովիկ Աբրահամյանը:

Իշխան Զաքարյանի առանձնատան վերաբերյալ հարցերին անդրադառնալով` Հովիկ Աբրահամյանն ասաց. «Չեմ տեսել, չեմ եղել, դրա համար կարծիք չունեմ»: