Ազատամարտիկները պահանջագիր ներկայացրեցին գլխավոր դատախազին

«Ի պաշտպանություն Վոլոդյա Ավետիսյանի» նախաձեռնող խմբի անդամներն ու ձերբակալված ազատամարտիկի  աջակիցներն այսօր պահանջագիր  ներկայացրեցին ՀՀ գլխավոր  դատախազ Գևորգ Կոստանյանին:

Ազատամարտիկների խոսքով' գլխավոր դատախազը պարտավոր է երկրում օրինականություն ապահովել, իսկ  ազատամարտիկ հերոսին անօրինական կալանքի տակ պահելը չի բխում մեր երկրի շահերից: Ազատամարտիկները գլխավոր դատախազից պահանջում էին անհախաղ ազատ արձակել Վոլոդյա Ավետիսյանին և նրա նկատմամբ դադարեցնել քրեական հետապնդումը:

Նախաձեռնող խմբի ղեկավար, «Խաչակիր» կազմակերպության խորհրդի նախագահ Գագիկ Սարուխանյանը և մի քանի այլ ազատամարտիկներ ստորագրեցին պահանջագիրը, սակայն, ըստ Սարուխանյանի,  իրականում  Վոլոդյա Ավետիսյանի պաշտպանության համար հավաքված ստորագրությունները 700-ից ավելի են:  Նրա խոսքով` Վոլոդյա Ավետիսյանը, ով պայքարում է ազատամարտիկների իրավունքների համար,  քաղաքական բանտարկյալ է, և դրա վառ վկայությունն այն է, որ մինչ օրս նրա նկատմամբ որևէ քննչական գործողություն չի կատարվել: «Ամբողջ հանրապետությունով մեկ ընկած` մարդ են ման գալիս, ով Վոլոդյայի դեմ ցուցմունք կտա, սակայն չեն գտնում»,- նշեց Սարուխանյանը:

Մանրամասները` yerkir.am-ի տեսանյութում: