Սկանդալ` Եվրախորհրդարանում

Հոկտեմբերի 23-24-ը Ստրասբուրգում՝ Եվրախորհրդարանի լիագումար նիստում, եվրապատգամավորները նախնական քվեարկությամբ հաստատել են Արեւելյան գործընկերության երկրների հետ հարաբերությունների ամրապնդման եւ մինչ այսօր գրանցած առաջընթացն ու անհաջողությունները ներկայացնող զեկույցի փոփոխությունները:

Զեկույցի կետերից 16­-րդը եւ 23-րդը Լեռնային Ղարաբաղի խնդրի վերաբերյալ են: Հենց այս կետերին առնչվող լուրերն են, որ տարաբնույթ մեկնաբանությունների պատճառ են դարձել դեռ երեկվանից:

Մասնավորապես` ադրբեջանական կողմի նախաձեռնությամբ տարածված լուրերի համաձայն՝ Եվրախորհրդարանը հաստատել է երկու կետերն էլ, որոնք, սակայն,  հակասում են իրար: Դրանցից առաջինի՝ 16-րդի համաձայն` Եվրախորհրդարանը հիշեցնում է իր դիրքորոշումն այն մասին, թե «Արեւելյան գործընկերության մի երկրի կողմից մյուսի տարածքի օկուպացիան խախտում է Արեւելյան գործընկերության հիմնարար սկզբունքներն ու նպատակները»: 23-րդ կետը տեղ-տեղ կրկնում է այս կետի որոշ դրույթներ, ամեն դեպքում՝ առանց այս մեջբերման:

Իրականում քվեարկության ժամանակ թյուրիմացություն է տեղի ունեցել, եւ ի վերջո, չի արձանագրվել՝ այս երկու կետերից ո՞րը մնաց եւ ո՞րը բացառվեց:

Իրավիճակն առավել պարզ ներկայացնելու նպատակով ԵՐԿԻՐ ՄԵԴԻԱ հեռուստաընկերությունը կապ է հաստատել Եվրոպայի Հայ Դատի հանձնախմբի ատենապետ Գասպար Կարապետյանի հետ: Տեսագրությունը կարող եք դիտել այստեղ: