Նախարարի հորդորը` ուկրաինացի դեսպանին

Հոկտեմբերի 24-ին ՀՀ սփյուռքի նախարար Հրանուշ Հակոբյանն ընդունեց ՀՀ-ում Ուկրաինայի առաջին դեսպան, հայագետ Ալեքսանդր Բոժկոյին. հայտնում են նախարարության մամլո գրասենյակից:

Սփյուռքի նախարարը հյուրին ներկայացրեց նախարարության կատարած աշխատանքները և առաջիկա ծրագրերը: «Խնդրում և միաժամանակ հորդորում եմ, որ Ուկրաինայի հայ համայնքում ստեղծվի այնպիսի մթնոլորտ, որտեղ բոլորը կխոսեն հայերեն, դա շատ կարևոր է, որ ընտանիքներում երեխաները մեծանան հայերեն խոսելով: Կարևոր է նաև, որ ավելի ակտիվ լինեք Սփյուռքի նախարարության կազմակերպած ծրագրերում, որոնք հայրենաճանաչության և հայապահպանության միջոցառումներ են»,- իր խոսքում նշեց նախարարը:

Ալեքսանդր Բոժկոն շնորհակալություն հայտնեց նախարարին ջերմ ընդունելության և Ուկրաինայի հայ համայնքի հանդեպ մեծ ուշադրության համար:

Հանդիպման ավարտին ՀՀ սփյուռքի նախարար Հրանուշ Հակոբյանը հայագիտության մեջ ներդրած ավանդի համար Ալեքսանդր Բոժկոյին պարգևատրեց ՀՀ սփյուռքի նախարարության «Մայրենիի դեսպան» մեդալով: