Նոր մանրամասներ` ''Երևան Սիթիի'' միջադեպից

Արդեն տեղեկացրել ենք, որ «Երևան Սիթի» սուպերմարկետում այսօր միջադեպ է տեղի ունեցել, որի  մասին մանրամասներ է հաղորդում ՀՀ ոստիկանության պաշտոնական կայքը:

Տարադրամի փոխանակման կետի աշխատակիցը` 1983 թ.-ին ծնված Սամվել Մ.-ն, վիճաբանել է 1981 թ.-ին ծնված Մհեր Ֆ.-ի հետ` վերջինիս կողմից կեղծ 500 ռուսական ռուբլի անվանական արժեքով թղթադրամ ներկայացնելու և փոխանակելու հարցով: Վիճաբանության ընթացքում նրանք միմյանց քաշքշել և հարվածել են, որի հետևանքով վայր են ընկել սուպերմարկետում գտնվող դեղատան ցուցափեղկի վրա` կոտրելով ապակին:

Նույն օրը` ժամը 14.45-ին, հիվանդանոցից ոստիկանության կենտրոնական բաժին ահազանգ է ստացվել, որ «գանգուղեղային վնասվածք, գլխուղեղի ցնցում» ախտորոշմամբ հիվանդանոց է տեղափոխվել Մհեր Ֆ.-ն, ով  հայտնել է, որ սուպերմարկետում վայր է ընկել և գլուխը հարվածել ցուցափեղկին: Մհեր Ֆ.-ն հրաժարվել է  բացատրություն տալուց:

Նշանակվել են դատաբժշկական և դատատեխնիկական փորձաքննություններ: Կատարվում է հետաքննություն: