Որսորդին կրակել սովորեցրինք, որ բանակ գնա

Երեկ «Մոսկվա» կինոթատրոնում տեղի ունեցավ կինոռեժիսոր Մարինե Զաքարյանի «Փասիանի որսորդը» ֆիլմի հանրային ցուցադրությունը:

«Պարալլելս Ֆիլմ» ընկերության տնօրեն եւ «Փասիանի որսորդը» ֆիլմի պրոդյուսեր Հովհաննես Գալստյանը yerkir.am-ի հետ զրույցում նշեց, որ ֆիլմը նկահարանվել է Վիլյամ Սարոյանի պատմվածքների հիման վրա եւ «Կիսալուսնի ծովածոցը» լիամետրաժ խաղարկային ֆիլմի հատվածներից մեկն է:

Ֆիլմում նկարահանվել են Սամվել Վարդանյանը, Անի Գալստյանը, Աշոտ Ադամյանը, Նարինե Գրիգորյանը, Կարեն եւ Սոս Ջանիբեկյանները: Ֆիլմի օպերատորը Միհրան Ստեփանյանն է, կոմպոզիտորը` Լիլիթ Նավասարդյանը:

«Ֆիլմը նկարվել է 2 մլն դրամով` 4 օրվա ընթացքում, բայց դա ֆիլմի որակի հաշվին չի արվել: Ֆիլմի գլխավոր հերոսը` Սամվել Վարդանյանը, այժմ գտնվում է բանակում. որսորդին կրակել սովորեցրինք, որ բանակ գնա»,- ասաց Գալստյանը` հավելելով, որ իրենք կինոթատրոնին որպես տաճարի են վերաբերվում եւ ուրախ են հանդիսատեսին եւս մեկ անգամ հանդիպել տաճարում:

Ի դեպ, ֆիլմը երեկ ցուցադրվեց երկու անգամ` հաշվի առնելով հանդիսատեսի հոսքը: