Ով կմնա՝ բարով մնա, ով գնա՝ բարով գնա. Ստյոպա Սաֆարյանը սպառնաց Հանրային խորհրդի որոշ անդամների

«Ես որևէ ջանք չեմ գործադրել այս պաշտոնում նշանակվելու համար, որևէ մեկի հեռացմամբ շահագրգռված չեմ եղել»,- ըստ Yerkir.am-ի՝ խոսելով Հանրային խորհրդի նախագահի պաշտոնում նշանակվելու մասին ասաց Ստյոպա Սաֆարյանը՝ լրագրողների հետ ճեպազրույցում:

Առաջին բանը, որ կանի Սաֆարյանը՝ Հանրային խորհիդի մասին օրենքի փոփոխություն կատարելն է:

Նա չհերքեց՝ վարչապետի հետ նախնական զրույց այդ մասին ունեցել են, ինքն էլ չի մերժել Նիկոլ Փաշինյանի առաջարկը:

Կառավարության ղեկավարը նիստի ժամանակ հասկացրեց, թե հավատում է Հանրային խորհրդի արդյունավետ աշխատանքին, բայց միայն իրեն հավատարիմ մարդկանց առկայությամբ:

Հանրային խորհրդում, պարզվում է, խաղի կանոնների հստակեցման խնդիր կա․ Սաֆարյանն ընդգծեց, որ այն խորհրդատվական, այլ ոչ թե քաղաքական մարմին է․ «Ով կմնա՝ բարով մնա, ով գնա բարով գնա: Հանրային խորհրդի քաղաքական խաղերի մասնակից անդամներին մեկ բան կասեմ՝ կա՛մ ես այստեղ պետք է անելիք չունենամ, կա՛մ Հանրային խորհրդի տվյալ անդամները»: Սա հստակ մեսիջ էր խորհրդի բոլոր անդամներին նորանշանակ նախագահի կողմից։

Եվ քանի որ Սաֆարյանն արդեն այդտեղ է, Հանրային խորհրդի որոշ անդամներ, թերևս,  մտածելու բան ունեն:

«Հանրային խորհրդի հետ հակասությունները գագաթնակետին են հասել Վազգեն Մանուկյանի վերջին նիստի ելույթից հետո: Իմ և իր պատկերացումները Հանրային խորհրդի վերաբերյալ տարբեր էին»,-նշել է Սաֆարյանը:

Թեպետ Սաֆարյանը կարծում է՝ միակ, մինուճար մարդու համբավ չունի, ասել է թե՝ անփոխարինելի չէ, բայց և հավաստիացրել է՝ ջանք չի խնայելու պաշտպանելու  հեղափոխությունը․ այսպես տալով հավատարմության երդում:

Ավելի վաղ Yerkir.am-ը հայտնել էր, որ Ստյոպ Սաֆարյանը նշանակվել է Հանրային խորհրդի նախագահ։