Արայիկ Բաղդադյանն ամփոփեց ըմբշամարտի աշխարհի առաջնությունը

Ազատ ոճի ըմբշամրարտի Հայաստանի հավաքականի գլխավոր մարզիչ Արայիկ Բաղդադյանն այսօր կայացած մամուլի ասուլիսի ժամանակ ամփոփեց Բուդապեշոտում անցկացված ըմբշամարտի աշխարհի առաջնության արդյունքները:

«Մեր աշխատանքից, ֆեդերացիայի աշխատանքից, մարզիկներից գոհ ենք: Մեր աշխատանքի արդյունքը ստացանք` 11 տարվա դադարից հետո ունենք աշխարհի չեմպիոն, ինչը շատ ուրախալի է: 

Ըմբիշների ելույթներից գոհ եմ: Արթուր Առաքելյանը զբաղեցրեց 5-րդ տեղը: Գրիգոր Գրիգորյանը նույնպես լավ մասնակցեց. նա երիտասարդ խոստումնալից մարզիկ է, դեռ իր խոսքը կասի միջազգային ասպարեզում: Միհրան Ջաբուրյանը պարտվեց Եվրոպայի գործող չեմպիոնին: Հրանտ Ենոքյանը ուսի վնասվածք ուներ, ինչը զգացնել տվեց: Ինչ վերաբերում է Մուսա Մուրտազալիևին, չէի ցանկանա ամբողջ մեղքը բարդել մրցավարների վրա: Ճիշտ է, նրանց մեղքի բաժինը կա, բայց Մուսան վերջում պարզապես չդիմացավ: Վերջին հավաքը այդքան էլ լավ չանցկացրեց, քանի որ վնասվածք ուներ:

Աշխարհի չեմպիոն Դավիթ Սաֆարյանը շատ ծանր գոտեմարտեր և հաղթանակներ ունեցավ: Իսկ եզրափակիչում գրագետ գոտեմարտ անցկացրեց և դարձավ աշխարհի չեմպիոն: Դավիթ Սաֆարյանը մեր լիարժեք քաղաքացին է, մեր հավաքականի անդամ, նա 2009-ից մասնակցում է մեր բոլոր հավաքներին և ասել, որ նրա հաղթանակի մեջ մեծ է նրա` ըմբշամարտի ռուսական դպրոց ունենալը, միանշանակ ասել չի կարելի»:

Հայաստանի ազատ ոճի ըմբշամարտի հավաքականը մինչև տարվա վերջը կմասնացի ևս 3 միջազգային մրցաշարի` Չեչնիայում, Ուկրաինայում և Ռուսաստանում: Դեկտեմբերին էլ կկայանա ազատ ոճի ըմբշամարտի Հայաստանի առաջնությունը: