Ռուսաստանում սպանվել է Pussy Riot-ին պաշտպանող հոգեւորականը

75-ամյա ուղղափառ քահանա Պավել Ադելգեյմը, ով հայտնի է նրանով, որ հրապարակավ պաշտպանում էր սկանդալային Pussy Riot խմբին, երեկ ուշ երեկոյան սպանված է հայտնաբերվել Պսկովում` դանակով հարվածներից բազմաթիվ վերքեր մարմնին. ըստ Mignews.com-ի` այսօր հայտարարություն է տարածել տեղի ոստիկանությունը:

Պսկովում ձերբակալվել է քահանայի սպանության մեջ մեղադրվող` 1986 թվականին ծնված երիտասարդ, ով, ըստ հետաքննության տվյալների, սպանությունը կատարելուց հետո ինքն իրեն նույնպես մի քանի հարված է հասցրել դանակով: Ներկայումս նա հիվանդանոցում է եւ կհարցաքննվի ապաքինումից հետո:

Նախնական տեղեկությունների համաձայն` երիտասարդը ծանոթ է եղել քահանային, հնսրավոր է` նրա հյուրն է եղել սպանության պահին, սակայն հանցագործության դրդապատճառները դեռեւս անհայտ են:

Պավել Ադելգեյմը բազմիցս հանդես է եկել Ռուս ուղղափառ եկեղեցու գործունեության քննադատությամբ, հատկապես` հավատացյալների զգացմունքների պաշտպանության օրենքի դեմ: Pussy Riot-ի գործով դատավարության ժամանակ նա պահանջում էր ներում շնորհել խմբի աղջիկներին: