Սկանդալ` կապված հայ մրցավարի հետ

Հուլիսի 11-ին հայաստանյան մրցավարական անձնակազմը՝  Անդրանիկ Արսենյանի գլխավորությամբ, սպասարկել է Եվրոպա լիգայի որակավորման առաջին փուլի «Ինտեր» Տուրկու (Ֆինլանդիա)-«Վիկինգուր» (Ֆարերյան կղզիներ) հանդիպումը: Խաղն ավարտվել է 0:1 հաշվով եւ հաջորդ փուլ է դուրս եկել ֆարերյան թիմը:

Հանդիպման ընթացքում Հայաստանը ներկայացնող մրցավար Անդրանիկ Արսենյանը երկու 11 մետրանոց է նշանակել երկու թիմերի օգտին: Ֆարերցիները դիպուկ են իրացրել 11 մետրանոցը, իսկ ֆինները վրիպել են:

Նկատի առնելով այն հանգամանքը, որ այդ խաղի հետ կապված սովորականից բարձր՝ մոտ 300 հազար եվրոյի խաղադրույք է կատարվել երկու թիմերի  կողմից էլ գոլ խփելու` բուքմեյքերական հարցումում, անկողմնակալ մրցավարության հետ կապված խնդիր է առաջացել, որն էլ պատճառ է հանդիսացել, որպեսզի կասկածներ առաջանան խաղի գլխավոր մրցավար Անդրանիկ Արսենյանի մրցավարության վերաբերյալ:

Այս առթիվ տարբեր ԶԼՄ-ներ դիմել են ՀՖՖ մամուլի քարտուղարություն, որին  ՀՖՖ-ն պատասխանել է, որ Հայաստանի ֆուտբոլի ֆեդերացիան թիվ մեկ շահագրգիռ կողմն է այս հարցի պարզաբանման տեսանկյունից եւ ինքն է հետամուտ լինելու, որ այն պարզաբանվի մինչեւ վերջ, քանի որ առնչվում է հայաստանցի մրցավարի մասնակցությամբ հանդիպմանը: ՀՖՖ մրցավարական բաժնում տեղի են ունեցել դիտումներ եւ մասնագիտական քննարկումներ, սակայն, հաշվի առնելով, որ այս պահին ընթանում է  հետաքննություն, Հայաստանի ֆուտբոլի ֆեդերացիան առայժմ զերծ կմնա գնահատականներից. տեղեկացնում է ՀՖՖ պաշտոնական կայքը: