Mercosur-ի անդամ երկրները հետ են կանչում իրենց դեսպաններին Եվրոպայից

Mercosur-ի անդամ երկրների` Արգենտինայի, Բրազիլիայի, Վենեսուելայի եւ Ուրուգվայի նախագահները Ուրուգվայի մայրաքաղաք Մոնտեվիդեոյում տեղի ունեցած գագաթաժողովում համատեղ որոշում են կայացրել հետ կանչել իրենց դեսպաններին Իսպանիայից, Իտալիայից, Պորտուգալիայից եւ Ֆրանսիայից: Պատճառը Բոլիվիայի նախագահ Էվո Մորալեսի ինքնաթիռի հետ կապված միջադեպն է. բավական չէ, որ Վիեննայում ինքնաթիռը պարտադրված վայրէջք էր կատարել, քանի որ կասկածներ են եղել, թե այնտեղ է ԿՀՎ նախկին գործակալ Էդվարդ Սնոուդենը, վերոհիշյալ եվրոպական երկրները փակել էին իրենց օդային տարածքը Մորալեսի ինքնաթիռի համար:

Լատինաամերիկյան առաջնորդները «վճռականորեն դատապարտում են» եվրոպական կառավարությունների գործողությունները` դրանք անվանելով «անհիմն, խտրական, մարդու իրավունքները խախտող». տեղեկացնում է РБК-ն:

Նրանք նաեւ հայտարարել են, որ ԱՄՆ իշխանությունները լուրջ հանցագործություն են կատարել` գաղտնի հետեւելով  այլ պետությունների քաղաքացիների:

Mercosur-ը Հարավային Ամերիկայի ընդհանուր շուկան է, որի անդամներն են Արգենտինան, Բրազիլիան, Վենեսուելան, Պարագվայը եւ Ուրուգվայը, եւս 5 լատինաամերիկյան պետություններ ասոցացված անդամներ են: Հուլիսի 12-ից կազմակերպության նախագահող երկիր է Վենեսուելան: Ավելի վաղ Պարագվայի անդամությունը ժամանակավորապես դադարեցվել է: