″Ինտիմ մասեր″. ամոթալի ոչինչ չկա

Այսօր «Ոսկե ծիրան» կինոփառատոնի շրջանակներում կմեկնարկի «Ռուսական կինոյի օրեր» ծրագիրը: Ռեժիսոր Նատաշա Մերկուլովայի «Ինտիմ մասեր» ֆիլմը նույնպես մասնակցում է ծրագրին:

Լրագրողների հետ զրույցում Մերկուլովան նշեց, որ ֆիլմը միջին խավի մոսկվացիների մասին հեգնական մելոդրամա է, քանի որ նրանցից յուրաքանչյուրն ունի իր գաղտնիքը` «ինտիմ մասերը»:

«Սա իմ առաջին ֆիլմն է, որի միջոցով փորձում եմ ցույց տալ հոգեբանական մի շարք խնդիրներ` էրոտիկ ֆոնի վրա: Շատերը չեն ցանկանում խոսել իրենց ինտիմ կյանքի խնդիրների մասին, որը, սակայն, մեծ հետք է թողնում նրանց վրա: Ռուսաստանում նոր-նոր են այդ մասին սկսում բարձրաձայնել»,- ասաց Մերկուլովան:

Ըստ նրա` ֆիլմը ցուցադրվել է նաեւ եվրոպական որոշ երկրներում, սակայն ֆիլմի թողած ազդեցությունը նույնը չէր, ինչ ՌԴ-ի հանդիսատեսի վրա, քանի որ Եվրոպայում ինտիմ կյանքի հետ կապված թեմաների շոշափման խնդիր չկա: «Ֆիլմում կան մերկ մարդիկ, որոնք իրենց էրոտիկ պատմություններ են պատմում. ամոթալի ոչինչ չկա»,- նշեց ռեժիսորը: