Կոնգրեսականն ինտիմ նկարներ է ուղարկել անծանոթ կանանց

ԱՄՆ դեմոկրատ կոնգրեսական Էնթոնի Վեյները խոստովանել է, որ կանանց հետ իր ինտիմ լուսանկարները ինքն է տարածել Twitter-ում, սակայն հրաժարական տալ չի պատրաստվում:

Ինչպես հաղորդում է Wall Street Journal-ը, Նյու Յորքում երկուշաբթի օրը մամուլի ասուլիսի ժամանակ Վեյներն ասել է, թե երեք տարի շարունակ իր ինտիմ նկարները ինտերնետի միջոցով ուղարկել է վեց տարբեր կանանց, որոնց երբեք չի հանդիպել:  

Աղմուկը բարձրացել է այն բանից հետո, երբ անցյալ շաբաթ Twitter-ով նա իր ինտիմ լուսանկարներն ուղարկել է Սիեթլի համալսարանում սովորող 21-ամյա մի աղջկա: Սկզբում նա հերքել է, թե լուսանկարներում ինքն է, եւ հայտարարել է, թե Twitter-ի իր էջը կոտրել են:

«Ես ազնիվ չեմ եղել ինքս ինձ հետ, ընտանիքիս, ինձ ընտրողների, ընկերներիս, համախոհներիս եւ լրատվամիջոցների հետ: Ամաչում եմ»,- ասել է կոնգրեսականը:

46-ամյա Վեյները ամուսնացած է ԱՄՆ պետքարտուղար Հիլարի Քլինթոնի օգնականի հետ: Նա հավակնում էր 2013 թվականին դառնալ Նյու Յորքի քաղաքապետ եւ ամենամեծ հնարավորությունները ուներ: