Տաջիկստանում առաջին անգամ հայկական խաչքար է կանգնեցվել

Հունիսի 8-ին Տաջիկստանի մայրաքաղաք Դուշանբեում տեղի է ունեցել խաչքարի օծման հանդիսավոր արարողություն, որին մասնակցել են Թուրքմենստանում և Տաջիկստանի Հանրապետությունում ՀՀ արտակարգ և լիազոր դեսպան Վլադիմիր Բադալյանը, Տաջիկստանի Հանրապետությունում ՀՀ պատվավոր հյուպատոս Սմբատ Հովհաննիսյանը, տեղի հայ համայնքի ներկայացուցիչներ, ինչպես նաև Մոսկվայից, Բիշքեկից, Ուզբեկստանից և այլ երկրներից ժամանած հյուրեր:

Խաչքարի օծումը կատարել է Միջին Ասիայի չորս երկրներում՝ Ուզբեկստանում, Տաջիկստանում, Ղրղզստանում, Թուրքմենստանում, հայ համայնքի հոգևոր առաջնորդ Տեր Գառնիկ քահանա Լոռեցյանը: Նույն օրը տեղի է ունեցել նաև հայ համայնքի ներկայացուցիչ 11 մանուկների մկրտություն:

Տաջիկստանի Հանրապետության տարածքում հայկական քրիստոնեական առաջին կոթողի՝ խաչքարի բացումը կարևոր իրադարձություն էր շուրջ 1000 հոգուց բաղկացած հայ համայնքի կյանքում: