Ահմադինեժադին Թեհրանի Քրեական դատարան են կանչել

Իրանի գործող նախագահ Մահմուդ Ահմադինեժադին Թեհրանի Քրեական դատարանից ծանուցագիր է ուղարկվել: Ըստ իրանական MehrNews գործակալության` դատարանին հայցով դիմել են երկրի խորհրդարանի նախագահ Ալի Լարիջանին եւ այլ խորհրդարանականներ: Դատավարությունը 4 ամսով հետաձգվել է` մինչեւ Ահմադինեժադի նախագահական պաշտոնավարման ավարտը:

Նախագահի աշխատակազմը եւ նրա կողմնակիցները հայտարարում են, որ տեղեկություններ չունեն հայցի բովանդակության մասին, եւ ընդգծում են, որ երկրի ղեկավարի անօրինական գործողությունները քննելու իրավունք ունի միայն Գերագույն դատարանը:

Ահմադինեժադը կպաշտոնավարի մինչեւ օգոստոս, դրանից հետո պաշտոնը կստանձնի հունիսի 14-ի ընտրություններում ընտրված Հասան Ռոհանին: