Հռոմի պապը 2015-ին ցանկանում է Հայաստան այցելել

Հռոմի պապ Ֆրանցիսկոսը ցանկանում է 2015 թվականին Հայաստան այցելել` մասնակցելու Հայոց ցեղասպանության 100-րդ տարելիցի միջոցառումներին. տեղեկացնում է Regnum-ը` վկայակոչելով թուրքական Zaman օրաթերթը:

Հիշեցնենք, որ օրեր առաջ Հռոմի պապն ընդունել էր Հայ կաթոլիկների առաջնորդի ղեկավարած պատվիրակությանը եւ ասել, որ Հայոց ցեղասպանությունը 20-րդ դարի առաջին ցեղասպանությունն էր: Դրան ի պատասխան հունիսի 8-ին Թուրքիայի ԱԳՆ-ն հայտարարություն էր տարածել` նշելով. «Հռոմի պապից պահանջվում է աջակցել խաղաղությանն ամբողջ աշխարհում, այլ ոչ թե պատմության վիճելի թեմաներ բարձրացնել»: Անկարայում Վատիկանի դեսպան Անտոնիո Լուչիբելոն հունիսի 8-ին կանչվել է ԱԳՆ եւ այնտեղ լսել է, որ Հռոմի պապի ասածներն «անընդունելի են», եւ Վատիկանը պետք է խուսափի քայլերից, որոնք վնաս կհասցնեն երկկողմ հարաբերություններին:

Թուրքիայի իշխանություններն առայժմ չեն քննարկում` այդ հայտարարությունների ֆոնին չեղյալ չե՞ն համարի Հռոմի պապի այցը Ստամբուլ. ավանդաբար Հռոմի կաթոլիկ եկեղեցու նորընտիր առաջնորդներն այցելում են Թուրքիայում Հունական ուղղափառ եկեղեցու պատրիարքություն: