Մոտ ապագայում Թուրքիան ԵՄ անդամ չի դառնա, եւ վերջ. գերմանացի քաղաքագետ

Մոտ ապագայում Թուրքիան ԵՄ անդամ չի դառնա, եւ վերջ. Regnum գործակալության թղթակցին ասել է գերմանացի հայտնի քաղաքագետ Ալեքսանդր Ռարը` ընդգծելով, որ իրականում դա չեն ցանկանում ե'ւ ԵՄ-ն, ե'ւ Թուրքիան: Ըստ նրա` Անկարան պարզապես ընդունել է ԵՄ-ի կողմից իրեն պարտադրված խաղի կանոնները, եւ հիմա այդ շրջանակներում ինքնուրույն է գործում:

«ԵՄ-ն խոստացավ, խոստացավ, սակայն իրականում միտք էլ չուներ Թուրքիային իր շարքերն ընդունել: Եվրոպացիները պնդում էին, թե դռները բաց են, սակայն մի շարք կարեւոր զիջումներ էին պահանջում, մասնավորապես` եվրոպական չափորոշիչներով օրենսդրության օպտիմալացում: Սակայն այսօր փաստացի դերերը փոխվել են. թուրքերը ձեւացնում են, թե դեռեւս ձգտում են ԵՄ եւ այդ պատրվակով ԵՄ-ից իրենց համար արտոնություններ են պահանջում»,- նշել է քաղաքագետը` ընդգծելով, որ թուրքական իշխանություններին շատ դժվար կլինի ժողովրդին համոզել, որ Թուրքիան իր 8 տոկոսանոց տնտեսական աճով ներգրավվի ԵՄ-ի տնտեսության մեջ, որի աճը տատանվում է զրոյի մոտակայքում, էլ չենք խոսում` պարտքային ճգնաժամի մասին:

Ներկա պահին, ըստ Ռարի,  կողմերի բանակցություններն ընթանում են ոչ թե անդամակցության, այլ ԵՄ-ի նկատմամբ Անկարայի կարգավիճակի մասին: «ԵՄ-ն ցանակնում է, որ Թուրքիան, ինչպես, օրինակ, Ուկրաինան, տարանցիկ տարածք լինի, էներգակիրների միջանցք: Թուրքերին էլ հարկավոր է ադրբեջանական, ռուսական եւ այլ էներգակիրների դիստրիբյուտորի դերը Հարավային Եվրոպայում»,- նշում է քաղաքագետը` հավելելով, որ, ընդ որում, թուրքական հավակնություններն ավելի հեռուն են գնում, քան սովորական տրազիտի դիմաց ստացած շահույթը. նրանք ցանկանում են կողքից գազ ձեռք բերել, դրա տերը դառնալ, այնուհետեւ այն վաճառել Եվրոպային` ստանալով տնտեսական զգալի դիվիդենդներ եւ ձեռք բերել շատ ծանրակշիռ աշխարհաքաղաքական գործոնի դեր: Եվ, ըստ քաղաքագետի, հենց  դա է պատճառը, որ Թուրքիան բավականին սառն է վերաբերվում NABUCCO նախագծին: