Տաշիրում կկառուցվի նոր մանկապարտեզ

Լոռու մարզի Տաշիր քաղաքի մանկապարտեզներից մեկը տարածքի ամենահին շինություններից է և կրում է ժամանակի կնիքը. քաղաքաշինական մասնագիտական փորձաքննության արդյունքում մանկապարտեզի շենքը համարվել է շահագործման համար ոչ պիտանի և վթարավտանգ:

«Տաշիր» բարեգործական հիմնադրամը տեղեկացնում է, որ հիմնադրամը՝ Կարեն և Սամվել Կարապետյանների գլխավորությամբ, որոշել է կառուցել նոր ու ժամանակակից բոլոր պահանջներին համապատասխանող մանկապարտեզ:

Կարապետյանների ընտանիքի ուշադրության կենտրոնում են շարունակում մնալ նաև դպրոցականները: Ինչպես ամեն տարի, այս տարի ևս, ըստ աշակերտների թվի, նրանց կողմից ֆինանսավորվել են թիվ 32 ընտրատարածքի բոլոր 55 դպրոցների շրջանավարտները` Վերջին զանգի միջոցառումները կազմակերպելու համար:

Ինչ վերաբերում է ՀՀ զինված ուժերին նվիրվելիք մեքենաներին, ապա արդեն իսկ կնքվել են մեքենաների ձեռքբերման համապատասխան պայմանագրերը, և հունիսի սկզբներին այդ մեքենաները կհանձնվեն բանակին: Մեքենաների մակնիշներն ընտրվել են բացառապես ՀՀ ՊՆ կողմից ներկայացված առաջարկների հիման վրա:

Իսկ հունիսի վերջին կիրականացվի ևս մեկ ավանդական դարձած ծրագիր. բարեգործական հիմնադրամի կողմից իրենց բանկային անհատական քարտերը կստանան ՀՀ մանկատների շրջանավարտները՝ որպես իրենց ինքնուրույն առաջին քայլերում աջակցություն: Քարտերի գումարների մասին կիրազեկվի լրացուցիչ: