Տաշիրում ալյուր ու ընտրակաշառք չի բաժանվել

ՀՀ գլխավոր դատախազության կայքէջից տեղեկանում ենք, որ դատախազության թեժ գծին զանգահարել է Լոռու մարզի Տաշիր քաղաքի բնակիչ Ս. Մարգարյանը եւ հայտնել, որ տարածաշրջանի բոլոր գյուղերում ՀՀԿ-ի կողմից մեկ անձին 25 կգ չափաբաժնով ալյուր է բաժանվում, իսկ գյուղապետերը 5000 դրամ ընտրակաշառք են տալիս: Գումարը քիչ համարողներին տալիս են 10 000 դրամ: Հեռախոսազանգի հեղինակը միաժամանակ նշել է, որ իրեն էլ են ընտրակաշառք առաջարկել, սակայն չի վերցրել, իսկ կոնկրետ անուններ նշել չի կարող:

Yerkir.am-ի հետ զրույցում Լոռու մարզի ոստիկանության վարչության պետ Ա. Համբարյանը տեղեկացրեց, որ Ս. Մարգարյանն իրականում Տաշիր քաղաքի բնակիչ չէ,  Ստեփանավանի Ամրակից գյուղից է:

Ըստ Համբարյանի` հիմա չեն կարողանում գտնել այդ մարդուն, բայցեւ վստահեցրեց, որ Տաշիր քաղաքում որեւէ ահազանգ չի գրացվել, միայն մի աղջիկ Երեւանում հաղորդել է, որ լցոնումներ են եղել, բայց դա էլ է հերքվում:

«Ընտրակաշառքի մասին խոսք գնալ չի կարող»,- հայտարարեց նա: