Ծեծկռտուք` ոստիկանների ու մրգաշատցիների միջեւ

Արարատյան դաշտին պատուհասած կարկուտի օրվանից սկսած` Արմավիրի մարզի Մրգաշատ գյուղի բնակիչները բողոքի ակցիաներ են անցկացնում: Գյուղացիները ամեն օր փորձում են փակել ավտոճանապարհը: Նրանք  կառավարությունից պահանջում են փոխհատուցել փչացած բերքի 30 տոկոսը եւ երկու տարով բանկերում սառեցնել իրենց վարկային պարտավորությունները: Մինչ օրս գյուղացիներն իրենց պահանջների վերաբերյալ ոչ մի պաշտոնական արձագանք չեն ստացել:

Այսօր, երբ  մրգաշատցիները հերթական անգամ կրկնել են իրենց ակցիան, միջամտել է ոստիկանությունը: Yerkir.am-ին հայտնի դարձավ, որ ոստիկանությունը ուժ է գործադրել` մրգաշատցիներին փորձելով դուրս հրել ճանապարհից: Գյուղացիների ու ոստիկանների միջեւ վեճ է բռնկվել, որը վերածվել է քաշքշուկի, այնուհետեւ` ծեծկռտուքի:

Գյուղացիները տեղի են տվել ու ազատել ճանապարհը, բայց վիճակը շարունակում է լարված մնալ, քանի որ նրանք չեն պատրաստվում հրաժարվել իրենց պահանջներից, ոստիկաններն էլ չեն պատրաստվում «ազատագրված» ճանապարհը հետ հանձնել: