Ի՞նչ են պահանջում ազատամարտիկները Ազատության հրապարակում

Մայիսի 11-ին Ազատության հրապարակում, ինչպես նախապես հայտարարվել էր, նստացույց է սկսել ազատամարտիկ, պահեստազորի գնդապետ Վոլոդյա Ավետիսյանը, ով իշխանություններից պահանջում է վերանայել զինծառայողների կենսաթոշակի հաշվարկման կարգը: Նրան են միացել մի խումբ այլ ազատամարտիկներ:

Ավելի վաղ Վոլոդյա Ավետիսյանը հանդես էր եկել հայտարարությամբ, որում ասված է. «Հայաստանի կառավարությունը, կոպտորեն խախտելով ՀՀ Սահմանադրության և օրենքների պահանջները, անտեսում է ազատամարտիկների, զինծառայողների և նրանց ընտանիքների անդամների սոցիալական իրավունքները:

Ազատամարտիկների և մարտական գործողությունների այլ մասնակիցների ու նրանց ընտանիքների անդամների սոցիալական ապահովության երաշխիքները խիստ անբավարար են: Անկախ սոցիալական առումներից, այս երևույթն ինքնին անհարիր է մարդկային և ազգային արժանապատվության տեսակետից:

ՀՀ կառավարությունը  հատուկ քաղաքականություն է իրականացնում զինծառայողներին հնարավորինս ցածր կենսաթոշակ վճարելու նպատակով: Ծառայության ընթացքում զինծառայողներին քիչ թե շատ տանելի վարձատրություն տրամադրելու պարագայում ՀՀ կառավարությունը կենսաթոշակի անցնելիս նրանց կենսաթոշակը հաշվարկում է օրենքով սահմանված կարգից բխող չափից առնվազն 3-4 անգամ ավելի պակաս չափով, ինչի հետևանքով կենսաթոշակի անցնող զինծառայողները հայտնվում են աղքատության մեջ:

Այդպիսի քաղաքականությամբ կառավարությունը բացահայտ կերպով ցույց է տալիս, որ զինծառայողներն իրեն պետք են միայն ծառայության ընթացքում: Նման երևույթը ոչ միայն սոցիալական անարդարություն է, այլև բացասաբար է ազդում Զինված ուժերի բարոյահոգեբանական վիճակի վրա, քանի որ զինծառայողներին դնում է վարձկանի կարգավիճակում:

ՀՀ կառավարությունից պահանջում եմ ՀՀ Սահմանադրությանն ու օրենքներին համապատասխան`

1. արմատապես վերանայել ազատամարտիկների և մարտական գործողությունների այլ մասնակիցների սոցիալական երաշխիքները,

2. վերանայել զինծառայողների կենսաթոշակի հաշվարկման կարգը,

3. ըստ այդմ` կատարել վերահաշվարկ և փոխհատուցել ազատամարտիկներին ու կենսաթոշակի անցած զինծառայողներին, ինչպես նաև նրանց ընտանիքների անդամներին:

Նշված պահանջների կատարմանը հասնելու նպատակով 2013 թ. մայիսի 11-ից` ժամը 10:00-ից, Երևանի Ազատության հրապարակում անցկացնում եմ նստացույց և ազատամարտիկներին, կենսաթոշակի անցած զինծառայողներին, ինչպես նաև այս հարցով մտահոգ ՀՀ այլ քաղաքացիներին հրավիրում եմ մասնակցելու այս պայքարին»:

Լուսանկարը՝ News.am-ի: