Ադրբեջանում ապօրինի գերության մեջ պահվող 70-ամյա Վագիֆ Խաչատրյանը հոսպիտալացվել է

Ադրբեջանում ապօրինաբար գերության մեջ պահվող 70-ամյա Վագիֆ Խաչատրյանը հոսպիտալացվել է։ Այս մասին հայտնում են ադրբեջանական ԶԼՄ-ները՝ հղում կատարելով երկրի արդարադատության նախարարությանը։ 

70-ամյա դատապարտյալ Վագիֆ Խաչատրյանի առողջական վիճակը վատթարացել է, նրա մոտ առաջացել են շնչառության դժվարացում և սրտի ցավեր։  Ըստ երկրի ԱՆ-ի՝ իրականացվել է ինտենսիվ թերապիա և վերակենդանացում, սակայն քանի որ նրա վիճակի էական բարելավում չի նկատվել, նա տեղափոխվել է համապատասխան պետական ​​բժշկական հաստատություն։

Այս պահին նրա վիճակը գնահատվում է ծանր, ինտենսիվ թերապիան շարունակվում է։

Հիշեցնենք, որ Վագիֆ Խաչատրյանին ադրբեջանցի զինվորականները բերման են ենթարկել, երբ վերջինս Արցախից մեկնում էր Երևան՝ բուժման նպատակով։ Նրան ձերբակալել են Լաչինի միջանցքում տեղադրված ապօրինի անցակետում։